ନୂଆଦିଲ୍ଲୀ, ଅକ୍ଟୋବର ୧୦, ୨୦୨୬: କକ୍ରୋଚ୍ ଜନତା ପାର୍ଟି (ସିଜେପି)ର ପ୍ରତିଷ୍ଠାତା ଅଭିଜୀତ ଦିପକେଙ୍କୁ ଦିଲ୍ଲୀ ବିମାନବନ୍ଦରରେ ଏକ ବିମାନ ଭିତରୁ ଦିଲ୍ଲୀ ପୋଲିସ ଦ୍ୱାରା ଅଟକ ରଖାଯାଇଛି। ଜନ୍ତର ମନ୍ତରରେ ସିଜେପିର ପ୍ରସ୍ତାବିତ ପ୍ରଦର୍ଶନ ପୂର୍ବରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଅଭିଜୀତ ଦିପକେ ନିଜର ଇନଷ୍ଟାଗ୍ରାମରେ ଏହି ଘଟଣାର ଏକ ଲାଇଭ୍ ଭିଡିଓ ସେୟାର କରିଛନ୍ତି, ଯେଉଁଥିରେ ପୋଲିସ ଅଧିକାରୀମାନେ ବିମାନ ମଧ୍ୟକୁ ପ୍ରବେଶ କରୁଥିବାର ନଜର ଆସିଛନ୍ତି। ତାଙ୍କ ସହିତ ଅନ୍ୟ ସିଜେପି ସଦସ୍ୟ ସୌରଭ ଦାସ ଏବଂ ଆଶୁତୋଷ ରାଙ୍କା ମଧ୍ୟ ବିମାନରୁ ଅଟକ ରଖାଯାଇଛନ୍ତି।
ଭିଡିଓରେ ଦିପକେ ଏବଂ ଅନ୍ୟ ସଦସ୍ୟମାନେ ପୋଲିସକୁ ପ୍ରଶ୍ନ କରୁଥିବା ଦେଖିବାକୁ ମିଳିଛି ଯେ ସେମାନେ ବିମାନରୁ ଓହ୍ଲାଇବା ପର୍ଯ୍ୟନ୍ତ କାହିଁକି ଅପେକ୍ଷା କଲେ ନାହିଁ। “ଆପଣମାନେ ଆମେ ବାହାରକୁ ଆସିବା ପର୍ଯ୍ୟନ୍ତ ଅପେକ୍ଷା କରିପାରିଥା’ନ୍ତେ। ଆସନ୍ତୁ ଆମକୁ ଗିରଫ କରନ୍ତୁ, ଆମେ ଭୟଭୀତ ନୁହଁୁ,” ବୋଲି ଦିପକେ ପୋଲିସକୁ କହିଥିଲେ। ସେ ମୁଖ୍ଯ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ପ୍ରଦର୍ଶନ କରିବା ପାଇଁ ସକାଳେ ମୁମ୍ବାଇରୁ ଦିଲ୍ଲୀ ଯାତ୍ରା କରିଥିଲେ।
ଏହି ପ୍ରଦର୍ଶନକୁ ରୋକିବା ପାଇଁ ପୋଲିସ ପକ୍ଷରୁ ବ୍ୟାପକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ସକାଳେ ୟୁଟ୍ୟୁବର୍ ଧ୍ରୁବ ରାଠୀ ଏବଂ ସିଜେପି ଆଇନଗତ ସେଲ୍ ମୁଖ୍ୟ ରତ୍ନା ସିଂହଙ୍କୁ ମଧ୍ୟ ସେମାନଙ୍କ ଘରେ ଅଟକ ରଖାଯାଇଥିଲା। ଏହା ବ୍ୟତୀତ, ରାତିସାରା ଦିଲ୍ଲୀ ପୋଲିସ ଦ୍ୱାରା ରାଜଧାନୀର ବିଭିନ୍ନ ସ୍ଥାନରୁ ପ୍ରାୟ ୪୦୦ ରୁ ଅଧିକ ସନ୍ଦିଗ୍ଧ ପ୍ରଦର୍ଶନକାରୀଙ୍କୁ ଅଟକ ଅଖାଯାଇଛି। ପୂର୍ବରୁ ଶୁକ୍ରବାର ଦିନ ଦିଲ୍ଲୀ ପୋଲିସ ସିଜେପି ପ୍ରଦର୍ଶନ ପାଇଁ ଅନୁମତି ଦେଇନଥିଲା ଏବଂ କହିଥିଲା ଯେ ଏଥିପାଇଁ ଯଥାସମୟରେ ଆବେଦନ କରାଯାଇ ନଥିଲା। ପ୍ରଦର୍ଶନକାରୀଙ୍କ ଗତିବିଧିକୁ ନିୟନ୍ତ୍ରଣ କରିବା ପାଇଁ ରାଜଧାନୀରେ ୪୫ଟି ମେଟ୍ରୋ ଷ୍ଟେସନ ବନ୍ଦ ରଖାଯିବା ସହ ବହୁ ସଂଖ୍ୟାରେ ଟ୍ରେନ୍ ମଧ୍ୟ ବାତିଲ କରାଯାଇଛି।
