ଭୁବନେଶ୍ୱର, ଅକ୍ଟୋବର ୦୭, ୨୦୨୬: ଭାରତର ଶିକ୍ଷା ବ୍ୟବସ୍ଥାରେ ଏଆଇ ପ୍ରଯୁକ୍ତିବିଦ୍ୟାର ବ୍ୟବହାରକୁ ଏକ ନୂତନ ଶିଖରକୁ ନେବା ପାଇଁ କେଏଲଏଚ୍ ହାଇଦ୍ରାବାଦ ପକ୍ଷରୁ ନିଜର ଆକାଂକ୍ଷୀ ‘ଏଜେଣ୍ଟିକ ଏଆଇ କ୍ୟାମ୍ପସ’ କାର୍ଯ୍ୟକ୍ରମର ଆନୁଷ୍ଠାନିକ ଘୋଷଣା କରାଯାଇଛି। ଏହି ପଦକ୍ଷେପ ଅଧୀନରେ ଶିକ୍ଷାନୁଷ୍ଠାନଟି ‘ଏଚସିଏଲ ଗ୍ରୁପ୍ ଏଆଇ ଲ୍ୟାବ୍ସ’ ସହିତ ଏକ ଗୁରୁତ୍ୱପୂର୍ଣ୍ଣ ଏମଓୟୁ ସ୍ୱାକ୍ଷର କରିଛି। ଏହି ସହବନ୍ଧନ କୃତ୍ରିମ ବୁଦ୍ଧିମତ୍ତା-ପରିଚାଳିତ ଶିକ୍ଷାଦାନ ଏବଂ ଛାତ୍ରଛାତ୍ରୀଙ୍କ ଗବେଷଣାତ୍ମକ ଉଦ୍ଭାବନକୁ ପ୍ରାଥମିକତା ଦେଇ ଏକ ବ୍ୟାପକ ରୋଡମ୍ୟାପ୍ ଉନ୍ମୋଚନ କରିଛି। ବିଭିନ୍ନ ବିଭାଗର ପାଠ୍ୟକ୍ରମରେ ବ୍ୟବହାରିକ ପ୍ରକଳ୍ପ, ଅଧ୍ୟାପକଙ୍କ ପ୍ରତ୍ୟକ୍ଷ ମାର୍ଗଦର୍ଶନ ଏବଂ ଶିଳ୍ପ ବିଶେଷଜ୍ଞଙ୍କ ଗ୍ରୁପ୍ ସହାୟତାରେ ଛାତ୍ରଛାତ୍ରୀମାନଙ୍କୁ ଆଧୁନିକ ଇଣ୍ଟେଲିଜେଣ୍ଟ ଟେକ୍ନୋଲୋଜି ବୁଝିବା, ନିର୍ମାଣ କରିବା ଏବଂ ପ୍ରୟୋଗ କରିବାରେ ଦକ୍ଷ କରିବା ଏହି ଯୋଜନାର ମୂଳ ଲକ୍ଷ୍ୟ। ହାଇଦ୍ରାବାଦସ୍ଥିତ କେଏଲଏଚ୍ ବାଚୁପଲ୍ଲୀ କ୍ୟାମ୍ପସରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏଚସିଏଲ ଗ୍ରୁପ୍ ଏଆଇ ଲ୍ୟାବ୍ସର ଜାତୀୟ ମୁଖ୍ୟ ଦୀପକ ସର୍ବାନନ ଯୋଗଦେଇ ଏହି କାର୍ଯ୍ୟକ୍ରମର ଉଦ୍ଘାଟନ କରିଥିଲେ।
ଏହି ଚୁକ୍ତିନାମା ସ୍ୱାକ୍ଷରିତ ହେବା ସମୟରେ କେଏଲଏଚ୍ ବାଚୁପଲ୍ଲୀର ପ୍ରିନ୍ସିପାଲ ଡଃ ଏଲ. କୋଟେସ୍ୱର ରାଓ ଏବଂ ଦକ୍ଷତା ବିକାଶ ବିଭାଗର ଡିନ୍ ଡଃ ଏ. ଶ୍ରୀନାଥ ଶିକ୍ଷାନୁଷ୍ଠାନର ପ୍ରତିନିଧିତ୍ୱ କରିଥିଲେ। ସେମାନଙ୍କ ସହିତ ଅନୁଷ୍ଠାନର ଅନ୍ୟାନ୍ୟ ବରିଷ୍ଠ ଅଧିକାରୀ, ଡିନ୍, ଅଧ୍ୟାପକ ଓ କର୍ମଚାରୀବୃନ୍ଦ ଉପସ୍ଥିତ ଥିଲେ। ଏହି ପ୍ରକଳ୍ପ ଏଆଇକୁ କେବଳ ଏକ ବିଷୟ ଭାବେ ନୁହେଁ, ବରଂ ଛାତ୍ରଛାତ୍ରୀଙ୍କ ଶିକ୍ଷଣ ପଦ୍ଧତିର ଏକ ଅବିଚ୍ଛେଦ୍ୟ ଅଂଶରେ ପରିଣତ କରିବାକୁ ଚାହୁଁଛି। ଶ୍ରେଣୀଗୃହର ଶିକ୍ଷାଦାନଠାରୁ ଆରମ୍ଭ କରି ବ୍ୟବହାରିକ ଆପ୍ଲିକେଶନ ବିକାଶ ପର୍ଯ୍ୟନ୍ତ, ପ୍ରତ୍ୟେକ ସ୍ତରରେ ଛାତ୍ରଛାତ୍ରୀମାନଙ୍କୁ ବିଭିନ୍ନ ବାସ୍ତବ ସମସ୍ୟାର ଅନୁଧ୍ୟାନ କରିବା, ନୂତନ ଚିନ୍ତାଧାରାର ପରୀକ୍ଷା କରିବା ଏବଂ ଶିଳ୍ପ ଓ ସମାଜ ପାଇଁ ଉପଯୋଗୀ ହୋଇପାରୁଥିବା ସମାଧାନ ପ୍ରସ୍ତୁତ କରିବାକୁ ପ୍ରୋତ୍ସାହିତ କରାଯିବ।
ଏହି ସହଯୋଗିତା ସମ୍ପର୍କରେ ନିଜର ମତାମତ ରଖି କେଏଲ୍ ଡିମ୍ଡ ଟୁ ବି ୟୁନିଭର୍ସିଟିର ଉପାଧ୍ୟକ୍ଷ ଇଞ୍ଜିନିୟର କୋନେରୁ ଲକ୍ଷ୍ମଣ ହାବିଶ କହିଛନ୍ତି ଯେ, ଛାତ୍ରଛାତ୍ରୀମାନେ ନିଜ ନିଜ କ୍ଷେତ୍ରରେ ଏଆଇର ବ୍ୟବହାରକୁ ଆହୁରି ସୃଜନଶୀଳ ରୂପ ଦେବା ପାଇଁ ଆବଶ୍ୟକୀୟ ଆତ୍ମବିଶ୍ୱାସ ଓ ଦକ୍ଷତା ହାସଲ କରନ୍ତୁ। ଏଚସିଏଲ ଗ୍ରୁପ୍ ଏଆଇ ଲ୍ୟାବ୍ସ ସହ ହୋଇଥିବା ଏହି ବୁଝାମଣା ଶ୍ରେଣୀଗୃହ ଶିକ୍ଷାକୁ ବାସ୍ତବ ପ୍ରକଳ୍ପ ଏବଂ ଶିଳ୍ପ ଅନୁଭୂତି ସହିତ ଯୋଡ଼ିବ, ଯାହା ଛାତ୍ରଛାତ୍ରୀଙ୍କୁ ସାମ୍ପ୍ରତିକ ଯୁଗର ଆବଶ୍ୟକତା ଅନୁଯାୟୀ ବୁଦ୍ଧିମତ୍ତାପୂର୍ଣ୍ଣ ସମାଧାନ ନିର୍ମାଣ କରିବାକୁ ସୁଯୋଗ ଦେବ। ଏହି ଏଜେଣ୍ଟିକ ଏଆଇ କ୍ୟାମ୍ପସ ବିକଶିତ କରିବା ଦ୍ୱାରା ଯୁବପିଢ଼ି ଦାୟିତ୍ୱର ସହିତ ନବସୃଜନ କରିପାରିବେ ଏବଂ ଭବିଷ୍ୟତର ବଦଳୁଥିବା କାର୍ଯ୍ୟକ୍ଷେତ୍ର ପାଇଁ ନିଜକୁ ପ୍ରସ୍ତୁତ କରିପାରିବେ।
ଏଜେଣ୍ଟିକ ଏଆଇ ସିଷ୍ଟମଗୁଡ଼ିକ ମାନବୀୟ ସୁପରଭିଜନ୍ ବା ତତ୍ତ୍ୱାବଧାନ ମଧ୍ୟରେ ରହି ଏକ ନିର୍ଦ୍ଦିଷ୍ଟ ଲକ୍ଷ୍ୟ ଅନୁସାରେ ଏକାଧିକ କାର୍ଯ୍ୟର ଯୋଜନା ଓ ସଫଳ କାର୍ଯ୍ୟକାରିତା କରିବାର କ୍ଷମତା ରଖନ୍ତି। ଏହିଭଳି ସିଷ୍ଟମର କାର୍ଯ୍ୟଶୈଳୀକୁ ଭଲ ଭାବେ ବୁଝିବା ଦ୍ୱାରା ଛାତ୍ରଛାତ୍ରୀମାନେ ତଥ୍ୟ ବିଶ୍ଳେଷଣ, କାର୍ଯ୍ୟପ୍ରବାହରେ ସମନ୍ୱୟ ଏବଂ ନିଷ୍ପତ୍ତି ଗ୍ରହଣ ପ୍ରକ୍ରିୟାକୁ ଆହୁରି ସୁଗମ କରିପାରିବେ। ଏହି ପ୍ରସ୍ତାବିତ ରୋଡମ୍ୟାପ୍ ବିଜନେସ୍ ଅଟୋମେଶନ, ଡାଟା-ଡ୍ରାଇଭେନ୍ ସେବା ଏବଂ ବିଭିନ୍ନ ବିଭାଗ-ଭିତ୍ତିକ ଏଆଇ ଆପ୍ଲିକେଶନ କ୍ଷେତ୍ରରେ ପ୍ରୋଜେକ୍ଟ-ଆଧାରିତ ଶିକ୍ଷା ପ୍ରଦାନ କରିବ, ଯାହାଦ୍ୱାରା ଛାତ୍ରଛାତ୍ରୀମାନେ ନିଜ ସମାଧାନର ସଠିକତା, ନିର୍ଭରଯୋଗ୍ୟତା ଓ ବ୍ୟବହାରିକ ମୂଲ୍ୟାଙ୍କନ କରିବାରେ ସମର୍ଥ ହେବେ।
ଏହି ସମଗ୍ର ଶିକ୍ଷା ପ୍ରଣାଳୀରେ ଅଧ୍ୟାପକମାନଙ୍କ ପ୍ରଶିକ୍ଷଣ ଓ ସାମର୍ଥ୍ୟ ବିକାଶକୁ ବିଶେଷ ପ୍ରାଥମିକତା ଦିଆଯାଉଛି। ଶିକ୍ଷାଦାନ, ମୂଲ୍ୟାୟନ ଏବଂ ମାର୍ଗଦର୍ଶନ ପ୍ରକ୍ରିୟାରେ ଏଆଇକୁ ସାମିଲ କରିବା ପାଇଁ ଶିକ୍ଷାବିତ୍ମାନଙ୍କୁ ସମ୍ପୂର୍ଣ୍ଣ ସହାୟତା ଯୋଗାଇ ଦିଆଯିବ, ଯାହା ଛାତ୍ରଛାତ୍ରୀଙ୍କ ବୈଷୟିକ ଦକ୍ଷତାକୁ ସମାଲୋଚନାତ୍ମକ ଓ ସ୍ୱାଧୀନ ଚିନ୍ତାଧାରା ସହ ସଂଯୋଗ କରିବ। ଏହା ସହିତ ତଥ୍ୟ ଗୋପନୀୟତା, ପକ୍ଷପାତିତା ଦୂରୀକରଣ, ନିର୍ଭରଯୋଗ୍ୟତା ଏବଂ ମାନବିକ ଉତ୍ତରଦାୟିତ୍ୱ ଭଳି ମୂଲ୍ୟବୋଧକୁ ଶିକ୍ଷାଦାନର କେନ୍ଦ୍ରବିନ୍ଦୁ କରାଯିବ। ଛାତ୍ରଛାତ୍ରୀମାନଙ୍କୁ ପ୍ରାପ୍ତ ଫଳାଫଳର ଯାଞ୍ଚ କରିବା ଏବଂ ପ୍ରଯୁକ୍ତିର ସୀମିତତାକୁ ବୁଝିବାକୁ ଉତ୍ସାହିତ କରାଯିବ। ଏଚସିଏଲ ଗ୍ରୁପ୍ ଏଆଇ ଲ୍ୟାବ୍ସ ସହ ଏହି ଭାଗିଦାରୀ ମାଧ୍ୟମରେ କେଏଲଏଚ୍ ହାଇଦ୍ରାବାଦ ନିଜର ବାଚୁପଲ୍ଲୀ ଓ ଅଜିଜନଗର କ୍ୟାମ୍ପସଗୁଡ଼ିକରେ ଶିକ୍ଷା ଓ ବାସ୍ତବ ଶିଳ୍ପଜଗତ ମଧ୍ୟରେ ଥିବା ଦୂରତାକୁ ଦୂର କରିବା ସହ ଛାତ୍ରଛାତ୍ରୀଙ୍କୁ ବିଶ୍ୱର ପ୍ରକୃତ ସମସ୍ୟାଗୁଡ଼ିକର ଚିନ୍ତନଶୀଳ ସମାଧାନ କରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ କରିବ।
