ଭୁବନେଶ୍ୱର, ୨ ଅକ୍ଟୋବର ୨୦୨୬: ଭାରତୀୟ ପ୍ରଯୁକ୍ତିବିଦ୍ୟାନ ସଂସ୍ଥାନ (ଆଇଆଇଟି) ଭୁବନେଶ୍ୱରରେ ସ୍ୱଚ୍ଛତା ଦିବସ ଓ ମହାତ୍ମା ଗାନ୍ଧୀଙ୍କ ଜନ୍ମଜୟନ୍ତୀ ଆଡ଼ମ୍ବରପୂର୍ଣ୍ଣ ଭାବେ ପାଳିତ ହୋଇଯାଇଛି। ଏହି ଅବସରରେ କ୍ୟାମ୍ପସ୍ ପରିସର ଏବଂ ଏହାର ଆଖପାଖ ଅଞ୍ଚଳକୁ ସ୍ୱଚ୍ଛ ଓ ନିର୍ମଳ ରଖିବାରେ ଉଲ୍ଲେଖନୀୟ ଯୋଗଦାନ ପାଇଁ ୧୨ ଜଣ ହାଉସକିପିଂ ଓ ଉଦ୍ୟାନକର୍ମୀଙ୍କୁ ସଫେଇମିତ୍ର ପୁରସ୍କାର-୨୦୨୬ରେ ସମ୍ମାନିତ କରାଯାଇଛି। ସଂସ୍ଥାନର ନିର୍ଦ୍ଦେଶକ ପ୍ରଫେସର ଶ୍ରୀପଦ କର୍ମାଲକର ଆୟୋଜିତ ବିଶେଷ ସମାରୋହରେ ଏହି ପୁରସ୍କାର ପ୍ରଦାନ କରିଥିଲେ। ରାଷ୍ଟ୍ରୀୟ “ସ୍ୱଚ୍ଛତା ହି ସେବା-୨୦୨୬” ଅଭିଯାନ ସହ ତାଳଦେଇ ଆଇଆଇଟି ଭୁବନେଶ୍ୱର ଚଳିତ ବର୍ଷର ମୂଳ ବିଷୟବସ୍ତୁ “ସ୍ୱଚ୍ଛତା ମେଁ ସହଭାଗ; ସ୍ୱଚ୍ଛ ଭାରତ, ବିକଶିତ ଭାରତ”କୁ ନେଇ ନିଜର ପ୍ରତିବଦ୍ଧତା ଦୋହରାଇବା ସହ ବିବିଧ କାର୍ଯ୍ୟକ୍ରମ ସଫଳତାର ସହ ସମ୍ପାଦନ କରିଛି।
ଏହି ଅଭିଯାନକୁ ସମ୍ପୂର୍ଣ୍ଣ ଭାବେ ପାଞ୍ଚଟି ମୁଖ୍ୟ ସ୍ତମ୍ଭ ଆଧାରରେ ପରିଚାଳିତ କରାଯାଇଥିଲା। ‘ସ୍ୱଚ୍ଛତା ଲକ୍ଷ୍ୟସ୍ଥଳୀର ରୂପାନ୍ତରଣ’ କାର୍ଯ୍ୟକ୍ରମ ଜରିଆରେ ଅବହେଳିତ ଅଳିଆ ଆବର୍ଜନା ସ୍ଥଳ ଏବଂ ସଫା କରିବା ପାଇଁ କଷ୍ଟସାଧ୍ୟ ସାର୍ବଜନୀନ ସ୍ଥାନଗୁଡ଼ିକର ରୂପାନ୍ତରଣ କରାଯାଇଥିଲା। ‘ସ୍ୱଚ୍ଛ ପାଠଶାଳା’ ମାଧ୍ୟମରେ ସ୍ୱଚ୍ଛତା ଓ ବର୍ଜ୍ୟବସ୍ତୁ ପରିଚାଳନା ସମ୍ପର୍କରେ ଛାତ୍ରଛାତ୍ରୀ ଏବଂ ଯୁବପିଢ଼ିଙ୍କ ମଧ୍ୟରେ ସଚେତନତା ସୃଷ୍ଟି କରାଯାଇଥିଲା। ‘ସଫେଇମିତ୍ର ସୁରକ୍ଷା ଏବଂ ସମ୍ମାନ ଶିବିର’ ଅଧୀନରେ ପରିମଳ କର୍ମଚାରୀମାନଙ୍କୁ ସୁରକ୍ଷା ଉପକରଣ, ସ୍ୱାସ୍ଥ୍ୟସେବା ଓ ବିଭିନ୍ନ କଲ୍ୟାଣକାରୀ ସୁବିଧା ଯୋଗାଇ ଦିଆଯାଇଥିଲା। ସେହିପରି ‘ଜନ ଭାଗିଦାରୀ’ ଜରିଆରେ ଉତ୍ସସ୍ଥଳରେ ବର୍ଜ୍ୟ ପୃଥକୀକରଣ ଏବଂ ପ୍ଲାଷ୍ଟିକ ବ୍ୟବହାର ବର୍ଜନ ପାଇଁ ସାଧାରଣ ନାଗରିକଙ୍କୁ ଉତ୍ସାହିତ କରାଯାଇଥିବା ବେଳେ ‘ସ୍ୱଚ୍ଛତାରୁ ସମୃଦ୍ଧି’ ଅଧୀନରେ ବର୍ଜ୍ୟରୁ ସମ୍ପଦ ସୃଷ୍ଟି, ଚକ୍ରାକାର ଅର୍ଥନୀତି, ଘରୋଇ କମ୍ପୋଷ୍ଟିଂ ଏବଂ ପୁନଃବ୍ୟବହାରକୁ ପ୍ରୋତ୍ସାହିତ କରାଯାଇଥିଲା।
ପୂର୍ବଦିନ, ଅର୍ଥାତ୍ ୧ ଅକ୍ଟୋବର ୨୦୨୬ରେ ସଂସ୍ଥାନ ପକ୍ଷରୁ ଏକ ବିଶାଳ ସାମୂହିକ ସ୍ୱଚ୍ଛତା ଅଭିଯାନ ଅନୁଷ୍ଠିତ ହୋଇଥିଲା। ଏଥିରେ ନିର୍ଦ୍ଦେଶକ ପ୍ରଫେସର ଶ୍ରୀପଦ କର୍ମାଲକର, ଡିନ୍ (ଛାତ୍ର ବ୍ୟାପାର) ପ୍ରଫେସର ମିହିର କୁମାର ଦାସ, କୁଳସଚିବ ଶ୍ରୀ ବାମଦେବ ଆଚାର୍ଯ୍ୟ, ପ୍ରୋଫେସର-ଇନ୍-ଚାର୍ଜ (ସ୍ୱଚ୍ଛତା) ଡ. ରେମ୍ୟା ନୀଲାଞ୍ଚେରୀ ଏବଂ ବରିଷ୍ଠ ସଂକାୟ ସଦସ୍ୟ ଓ କର୍ମଚାରୀମାନେ ହାଉସକିପିଂ କର୍ମଚାରୀଙ୍କ ସହ ସାମିଲ ହୋଇ ସଂସ୍ଥାନର ମୁଖ୍ୟ ଫାଟକ ସମ୍ମୁଖସ୍ଥ ରାସ୍ତା ସଫା କରିଥିଲେ।
୨ ଅକ୍ଟୋବର ୨୦୨୬ ଗାନ୍ଧୀ ଜୟନ୍ତୀ ଦିବସରେ ସଂସ୍ଥାନର ସମସ୍ତ ସଦସ୍ୟ ରାଷ୍ଟ୍ରପିତା ମହାତ୍ମା ଗାନ୍ଧୀଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି ଓ ପୁଷ୍ପାଞ୍ଜଳି ଅର୍ପଣ କରିଥିଲେ। ଏହି ଅବସରରେ ପ୍ରଫେସର ଶ୍ରୀପଦ କର୍ମାଲକର ସବୁଜ ଓ ସ୍ୱଚ୍ଛ କ୍ୟାମ୍ପସ୍ ଗଠନର ସଙ୍କଳ୍ପ ଦୋହରାଇବା ସହ ସ୍ୱଚ୍ଛତା ପାଇଁ ଅଧିକ ଧ୍ୟାନ ଆବଶ୍ୟକ କରୁଥିବା ସ୍ଥାନଗୁଡ଼ିକୁ ଚିହ୍ନଟ କରି ନିରନ୍ତର ଉନ୍ନତିମୂଳକ କାର୍ଯ୍ୟ ଜାରି ରଖିବାକୁ ଆହ୍ୱାନ ଦେଇଥିଲେ। କୁଳସଚିବ ଶ୍ରୀ ବାମଦେବ ଆଚାର୍ଯ୍ୟ କ୍ୟାମ୍ପସ୍ର ସ୍ୱଚ୍ଛତା ବଜାୟ ରଖିବା ପାଇଁ ସମସ୍ତଙ୍କୁ ପ୍ରେରିତ କରିଥିବା ବେଳେ ଡ. ରେମ୍ୟା ନୀଲାଞ୍ଚେରୀ ଅଭିଯାନର ବିବିଧ କାର୍ଯ୍ୟକଳାପ ସମ୍ପର୍କରେ ବିବରଣୀ ପ୍ରଦାନ କରିଥିଲେ। ସଂସ୍ଥାନର ସଂକାୟ ସଦସ୍ୟ, କର୍ମଚାରୀ, ଛାତ୍ରଛାତ୍ରୀ ଏବଂ ଅଧିବାସୀମାନଙ୍କର ସକ୍ରିୟ ଭାଗିଦାରୀ ଯୋଗୁଁ ଏହି ସ୍ୱଚ୍ଛତା ମିଶନ ସମ୍ପୂର୍ଣ୍ଣ ସଫଳ ହୋଇପାରିଛି।
