ଭୁବନେଶ୍ୱର, ୭ ଅଗଷ୍ଟ, ୨୦୨୬: ରାଜ୍ୟରେ ଶିଶୁମାନଙ୍କ ସ୍ୱାସ୍ଥ୍ୟ ସୁରକ୍ଷା, ଆନିମିଆ ନିୟନ୍ତ୍ରଣ ଏବଂ ପରଜୀବୀ କୃମି ସଂକ୍ରମଣର ସ୍ଥାୟୀ ନିରାକରଣ ପାଇଁ ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ନିର୍ଦ୍ଦେଶାଳୟ, ୟୁନିସେଫ୍ର ମିଳିତ ସହଯୋଗରେ ୧୦ ଅଗଷ୍ଟ ୨୦୨୬ରୁ ‘ଜାତୀୟ କୃମିନାଶକ ଦିବସ’ ପାଳନ କରିବାକୁ ଯାଉଛି। କୌଣସି କାରଣରୁ ୧୦ ଅଗଷ୍ଟରେ ଔଷଧ ଖାଇବାରୁ ବଞ୍ଚିତ ହୋଇଥିବା ଶିଶୁ ଓ ମହିଳାମାନଙ୍କ ପାଇଁ ୧୭ ଅଗଷ୍ଟରେ ମପ୍-ଅପ୍ ରାଉଣ୍ଡ ଜରିଆରେ ଔଷଧ ସେବନ କରାଯିବ।
ଏହି ସ୍ୱାସ୍ଥ୍ୟ କାର୍ଯ୍ୟକ୍ରମ ଅଧୀନରେ ଓଡ଼ିଶାର ୩୦ଟି ଯାକ ଜିଲ୍ଲାରେ ୧ରୁ ୧୯ ବର୍ଷ ବୟସର ୧.୬୧ କୋଟିରୁ ଅଧିକ ଶିଶୁ ଓ କିଶୋର-କିଶୋରୀ ଏବଂ ୨୦ରୁ ୨୪ ବର୍ଷ ବୟସର ୧୯ ଲକ୍ଷରୁ ଅଧିକ ପ୍ରଜନନକ୍ଷମ ମହିଳାଙ୍କୁ ଆଲବେଣ୍ଡାଜୋଲ୍ ଔଷଧ ଦିଆଯିବ। ଏଥିମଧ୍ୟରେ ୧ରୁ ୫ ବର୍ଷର ୩୨ ଲକ୍ଷ ୯୪ ହଜାର ୬୩୦ ଜଣ ଶିଶୁ ଏବଂ ୬ରୁ ୧୯ ବର୍ଷ ବୟସର ୧ କୋଟି ୨୮ ଲକ୍ଷ ୮୯ ହଜାର ୭୧ ଜଣ ଶିଶୁ ସାମିଲ ରହିଛନ୍ତି।
ଏହାସହିତ ଦ୍ୱିବାର୍ଷିକ ଭିଟାମିନ୍-ଏ ସପ୍ଲିମେଣ୍ଟେସନ୍ ଅଭିଯାନ ମାଧ୍ୟମରେ ଅଗଷ୍ଟ ମାସ ସାରା ୯ରୁ ୬୦ ମାସ ବୟସର ପ୍ରାୟ ୩୨ ଲକ୍ଷ ଶିଶୁଙ୍କୁ ଭିଟାମିନ୍-ଏ ଖୋରାକ ପ୍ରଦାନ କରାଯିବ। ଏହା ଶିଶୁଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବା ସହ ବିଭିନ୍ନ ଅସୁସ୍ଥତା ଓ ଶିଶୁ ମୃତ୍ୟୁହାର ହ୍ରାସ କରିବାରେ ବେଶ୍ ସହାୟକ ହେବ।
ଶିଶୁ ସ୍ୱାସ୍ଥ୍ୟ ଅତିରିକ୍ତ ନିର୍ଦ୍ଦେଶକ ଡା. ଆଦିତ୍ୟ ମହାପାତ୍ର ଏହି କାର୍ଯ୍ୟକ୍ରମର ଗୁରୁତ୍ୱ ସମ୍ପର୍କରେ ଆଲୋକପାତ କରି କହିଛନ୍ତି ଯେ, ଜାତୀୟ କୃମିନାଶକ ଦିବସ ଅନ୍ତନଳୀ କୃମି ସଂକ୍ରମଣରୁ ଶିଶୁଙ୍କୁ ରକ୍ଷା କରି ସେମାନଙ୍କ ସ୍ୱାଭାବିକ ବୃଦ୍ଧିରେ ସାହାଯ୍ୟ କରେ। ନିୟମିତ ଏହି ଔଷଧ ସେବନ ଦ୍ୱାରା ପୋଷକତତ୍ତ୍ୱ ଗ୍ରହଣ କ୍ଷମତା ବୃଦ୍ଧି ପାଏ, ଯାହା ଶିଶୁଙ୍କ ପାଠପଢ଼ା ଦକ୍ଷତା ବଢ଼ାଇବା ସହ ରକ୍ତହୀନତା ରୋକିବାରେ ପ୍ରମୁଖ ଭୂମିକା ଗ୍ରହଣ କରେ। ଏହା ମହିଳା ଓ କିଶୋରୀଙ୍କ ସ୍ୱାସ୍ଥ୍ୟ ପାଇଁ ମଧ୍ୟ ହିତକର।
ୟୁନିସେଫ୍ ଓଡ଼ିଶାର ପୁଷ୍ଟିସାର ବିଶେଷଜ୍ଞ ସୌରଭ ଭଟ୍ଟାଚାର୍ଯ୍ୟ କହିଛନ୍ତି ଯେ, କୃମିନାଶକ ଔଷଧ ଏବଂ ଭିଟାମିନ୍-ଏର ସମନ୍ୱିତ ପ୍ରଦାନ ଦ୍ୱାରା ଶିଶୁମାନେ ଏକାସାଙ୍ଗରେ ଆବଶ୍ୟକୀୟ ପୋଷଣ ସେବା ପାଉଛନ୍ତି। ଏହା କୁପୋଷଣ ଦୂର କରିବା ସହ ପ୍ରତ୍ୟେକ ଶିଶୁଙ୍କୁ ଏକ ସୁସ୍ଥ ଶାରୀରିକ ଓ ମାନସିକ ଭବିଷ୍ୟତ ଆଡ଼କୁ ନେଇଯିବ।
ଏହି ସାର୍ବଜନୀନ ଅଭିଯାନ ସମସ୍ତ ସରକାରୀ, ସରକାରୀ ଅନୁଦାନପ୍ରାପ୍ତ, ବେସରକାରୀ ସ୍କୁଲ୍ ଏବଂ ଅଙ୍ଗନୱାଡ଼ି କେନ୍ଦ୍ରଗୁଡ଼ିକରେ ପରିଚାଳିତ ହେବ, ଯେଉଁଥିରେ ଶିକ୍ଷକ, ଅଙ୍ଗନୱାଡ଼ି କର୍ମୀ ଓ ଆଶା କର୍ମୀମାନେ ନିୟୋଜିତ ହେବେ। ଏହି ସାମ୍ବାଦିକ ସମ୍ମିଳନୀରେ ଯୁଗ୍ମ ନିର୍ଦ୍ଦେଶକ (ପୁଷ୍ଟିସାର) ଡକ୍ଟର ସ୍ମୃତିଜିତ୍ ପଟ୍ଟନାୟକ, ଯୁଗ୍ମ ନିର୍ଦ୍ଦେଶକ (ଶିଶୁ ସ୍ୱାସ୍ଥ୍ୟ) ଡକ୍ଟର ପ୍ରତିଭା ପ୍ରଧାନ ଏବଂ ୟୁନିସେଫ୍ ଓଡ଼ିଶାର ଡକ୍ଟର ସଞ୍ଜୟ କୁମାର ସାହୁ ମଧ୍ୟ ଉପସ୍ଥିତ ଥିଲେ।
