ଅକ୍ଟୋବର ୧୩, ୨୦୨୬, ନୂଆଦିଲ୍ଲୀ: ଟାଇପ୍-୧ ଏବଂ ଟାଇପ୍-୨ ଡାଇବେଟିସ୍ ସମ୍ପର୍କରେ ଆପଣ ଶୁଣିଥିବେ, କିନ୍ତୁ ବର୍ତ୍ତମାନ ଚିକିତ୍ସା ଜଗତରେ ‘ଡବଲ ଡାଇବେଟିସ୍’ ଶବ୍ଦଟି ବେଶ୍ ଚର୍ଚ୍ଚାରେ ରହିଛି। ବିଶେଷଜ୍ଞଙ୍କ ମତରେ, ଏହା କୌଣସି ଅଲଗା ପ୍ରକାରର ଡାଇବେଟିସ୍ ନୁହେଁ ବରଂ ଏହା ଏପରି ଏକ ସ୍ଥିତି ଯେଉଁଥିରେ ଟାଇପ୍-୧ ଡାଇବେଟିସ୍ ରୋଗୀଙ୍କ ଠାରେ ଟାଇପ୍-୨ ଡାଇବେଟିସ୍ର ଲକ୍ଷଣ ଅର୍ଥାତ୍ ‘ଇନସୁଲିନ୍ ପ୍ରତିରୋଧକ ଶକ୍ତି’ ଦେଖାଯାଇଥାଏ।
ଡାଇବେଟିସ୍ ବିଶେଷଜ୍ଞଙ୍କ ଅନୁଯାୟୀ, ଟାଇପ୍-୧ ଡାଇବେଟିସ୍ ସେତେବେଳେ ହୋଇଥାଏ ଯେତେବେଳେ ଶରୀରରେ ଯଥେଷ୍ଟ ପରିମାଣରେ ଇନସୁଲିନ୍ ପ୍ରସ୍ତୁତ ହୋଇନଥାଏ। କିନ୍ତୁ ସମୟ ସହିତ, ଓଜନ ବୃଦ୍ଧି, ଶାରୀରିକ ଶ୍ରମ କମିବା, ଜେନେଟିକ୍ କାରଣ ଏବଂ ଅନ୍ୟାନ୍ୟ ମେଟାବୋଲିକ୍ କାରଣରୁ ଶରୀରର କୋଷଗୁଡ଼ିକ ଇନସୁଲିନ୍ ପ୍ରତି ସଠିକ୍ ଭାବେ ପ୍ରତିକ୍ରିୟା ଦେବା ବନ୍ଦ କରିଦିଅନ୍ତି। ଫଳରେ ରୋଗୀଙ୍କ ଶରୀରରେ ଇନସୁଲିନ୍ ପ୍ରତିରୋଧକତା ବୃଦ୍ଧି ପାଇଥାଏ, ଯାହାକୁ ‘ଡବଲ ଡାଇବେଟିସ୍’ କୁହାଯାଏ।
ଏହି ସ୍ଥିତିରେ କାହାକୁ ଅଧିକ ବିପଦ ରହିଛି, ସେ ସମ୍ପର୍କରେ ବିଶେଷଜ୍ଞମାନେ ଚେତାଇ ଦେଇଛନ୍ତି ଯେ ଯେଉଁ ବ୍ୟକ୍ତିଙ୍କ ପରିବାରରେ ପୂର୍ବରୁ ଟାଇପ୍-୨ ଡାଇବେଟିସର ଇତିହାସ ରହିଛି, ସେମାନଙ୍କ ପାଇଁ ଏହି ବିପଦ ଅଧିକ ଥାଏ। ଏହାବ୍ୟତୀତ ଅସ୍ୱାସ୍ଥ୍ୟକର ଖାଦ୍ୟପେୟ, କମ୍ ଶାରୀରିକ ପରିଶ୍ରମ ଏବଂ ଅତ୍ୟଧିକ ଓଜନ ବୃଦ୍ଧି ମଧ୍ୟ ଏହାର ପ୍ରମୁଖ କାରଣ ହୋଇପାରେ।
ଡବଲ ଡାଇବେଟିସର ଲକ୍ଷଣଗୁଡ଼ିକୁ କିପରି ଚିହ୍ନିବେ? ଶରୀରରେ ହଠାତ୍ ଇନସୁଲିନ୍ ଆବଶ୍ୟକତା ବୃଦ୍ଧି ପାଇବା, କୌଣସି ସ୍ପଷ୍ଟ କାରଣ ବିନା ଓଜନ ବଢ଼ିବା, ରକ୍ତରେ ଶର୍କରାର ମାତ୍ରା ନିୟନ୍ତ୍ରଣ କରିବାରେ ଅସୁବିଧା ହେବା, ପେଟର ଆକାର ବଢ଼ିବା ଏବଂ ଉଚ୍ଚ ରକ୍ତଚାପ ଭଳି ଲକ୍ଷଣ ଦେଖାଦେଲେ ସତର୍କ ହେବା ଉଚ୍ଚତ୍। ଡାକ୍ତରମାନେ ଗ୍ଲୁକୋଜ୍ ଏବଂ ଲିପିଡ୍ ଟେଷ୍ଟ୍ ମାଧ୍ୟମରେ ଏହାର ଯାଞ୍ଚ କରିଥାନ୍ତି।
ଏହାର ଚିକିତ୍ସା ଏବଂ ସତର୍କତା: ଯେହେତୁ ବ୍ୟକ୍ତିଜଣକ ଟାଇପ୍-୧ ଡାଇବେଟିସରେ ଆକ୍ରାନ୍ତ, ତେଣୁ ଇନସୁଲିନ୍ ନେବା ଜରୁରୀ ଅଟେ। କିନ୍ତୁ ଏଥିସହିତ ଓଜନ ନିୟନ୍ତ୍ରଣ, ଶାରୀରିକ ବ୍ୟାୟାମ ଏବଂ ଇନସୁଲିନ୍ ସମ୍ବେଦନଶୀଳତା ବୃଦ୍ଧି କରିବା ପାଇଁ ଡାକ୍ତରମାନେ ପରାମର୍ଶ ଦେଇଥାନ୍ତି। କିଛି କ୍ଷେତ୍ରରେ ଅତିରିକ୍ତ ଔଷଧ ମଧ୍ୟ ଦିଆଯାଇପାରେ। ଡାକ୍ତରଙ୍କ ପରାମର୍ଶ ବିନା କେବେ ମଧ୍ୟ ଇନସୁଲିନ୍ ମାତ୍ରା କମାଇବା କିମ୍ବା ବନ୍ଦ କରିବା ଉଚିତ୍ ନୁହେଁ। ନିୟମିତ ସ୍କ୍ରିନିଂ ଏବଂ ରକ୍ତ ଶର୍କରା, ରକ୍ତଚାପ ଓ କୋଲେଷ୍ଟ୍ରୋଲ୍ ମନିଟରିଂ କରିବା ଦ୍ୱାରା ଏହାର ଜଟିଳତାରୁ ମୁକ୍ତି ମିଳିପାରିବ।
