କେନ୍ଦ୍ର ସରକାର ଘରୋଇ ଏଲପିଜି (୧୪.୨ କିଲୋଗ୍ରାମ) ସିଲିଣ୍ଡର ବୁକିଂ ମଧ୍ୟରେ ଥିବା ବାଧ୍ୟତାମୂଳକ ବ୍ୟବଧାନକୁ ୨୫ ଦିନରୁ ୩୫ ଦିନକୁ ବୃଦ୍ଧି କରିଛନ୍ତି। ପଶ୍ଚିମ ଏସିଆରେ ଚାଲିଥିବା ଯୁଦ୍ଧ କାରଣରୁ ଗ୍ୟାସ ଯୋଗାଣ ବାଧାପ୍ରାପ୍ତ ହୋଇଥିବାରୁ ଏହି ନିଷ୍ପତ୍ତି ନିଆଯାଇଛି। ବିଶେଷ କରି ସହରାଞ୍ଚଳର ପରିବାର ଯେଉଁମାନଙ୍କର ଦୁଇଟି ସିଲିଣ୍ଡର ସଂଯୋଗ ରହିଛି, ସେମାନେ ଏବେ ଗୋଟିଏ ସିଲିଣ୍ଡର ପାଇବା ପରେ ପରବର୍ତ୍ତୀ ବୁକିଂ ପାଇଁ ୩୫ ଦିନ ଅପେକ୍ଷା କରିବାକୁ ପଡ଼ିବ। ଏହି ନୂତନ ନିୟମ ପିଏମ୍ ଉଜ୍ଜ୍ୱଳା ଯୋଜନା ବାହାରେ ଥିବା ଗ୍ରାହକମାନଙ୍କ ପାଇଁ ଲାଗୁ ହେବ। ବାଣିଜ୍ୟିକ ବ୍ୟବହାର ପାଇଁ ବ୍ୟବହୃତ ୧୯ କିଲୋଗ୍ରାମ ସିଲିଣ୍ଡର ଯୋଗାଣ ଉପରେ ମଧ୍ୟ ଅଧିକ ଚାପ ରହିଛି, ଯାହା ଫଳରେ କ୍ଷୁଦ୍ର ଖାଦ୍ୟ ଦୋକାନୀମାନେ ଅସୁବିଧାର ସମ୍ମୁଖୀନ ହେଉଛନ୍ତି।
ଅନ୍ୟପଟେ ଏଲପିଜି ସଙ୍କଟକୁ ଦୃଷ୍ଟିରେ ରଖି ତୈଳ ବିପଣନ କମ୍ପାନୀଗୁଡ଼ିକ ଏକ ନୂତନ ପ୍ରସ୍ତାବ ଉପରେ ବିଚାର କରୁଛନ୍ତି। ବର୍ତ୍ତମାନର ୧୪.୨ କିଲୋଗ୍ରାମ ବଦଳରେ ୧୦ କିଲୋଗ୍ରାମର କମ୍ ଓଜନ ବିଶିଷ୍ଟ ସିଲିଣ୍ଡର ଯୋଗାଇବା ପାଇଁ ସରକାରଙ୍କ ଅନୁମତି ଲୋଡ଼ାଯାଇଛି। ଯଦିଓ ପେଟ୍ରୋଲିୟମ ମନ୍ତ୍ରଣାଳୟ ଏହାକୁ ଏକ ଗୁଜବ ବୋଲି କହିଛି, କିନ୍ତୁ ବିଶୋଧନାଗାର କର୍ତ୍ତୃପକ୍ଷ ନିଶ୍ଚିତ କରିଛନ୍ତି ଯେ ସମାନ ଭାବରେ ଗ୍ୟାସ ବଣ୍ଟନ ପାଇଁ ଏହି ପ୍ରସ୍ତାବ ସରକାରଙ୍କ ବିଚାରାଧୀନ ରହିଛି। ପଶ୍ଚିମ ଏସିଆର ଉତ୍ତେଜନା ଯୋଗୁଁ ଆମଦାନୀ ବାଧାପ୍ରାପ୍ତ ହୋଇଥିବାରୁ ସରକାର ବର୍ତ୍ତମାନ ଘରୋଇ ଉତ୍ପାଦନକୁ ଅଧିକ ପ୍ରାଧାନ୍ୟ ଦେଉଛନ୍ତି। ଏହି ସମସ୍ୟା ଯୋଗୁଁ ଅନେକ ଗ୍ରାହକ ପାଇପ୍ ଗ୍ୟାସ ବ୍ୟବହାର କରିବାକୁ ଆରମ୍ଭ କଲେଣି।
