ଭାରତୀୟ କମ୍ୟୁନିଷ୍ଟ ପାର୍ଟି (ସିପିଆଇ)ର ଓଡ଼ିଶା ରାଜ୍ୟ ପରିଷଦ ବୈଠକ ଭୁବନେଶ୍ୱରସ୍ଥିତ ପାର୍ଟିର ରାଜ୍ୟ କାର୍ଯ୍ୟାଳୟ ଭଗବତୀ ଭବନଠାରେ ଭାଗବତ ପ୍ରତିହାରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏହି ବୈଠକରେ ରାଜ୍ୟ ସମ୍ପାଦକ ଡଃ ପ୍ରଶାନ୍ତ କୁମାର ମିଶ୍ର ଓଡ଼ିଶାର ବର୍ତ୍ତମାନର ସାମାଜିକ ଓ ରାଜନୈତିକ ସ୍ଥିତି ଉପରେ ଗଭୀର କ୍ଷୋଭ ପ୍ରକାଶ କରିଥିଲେ । ବିଶେଷ କରି ସରକାରଙ୍କ ଇଙ୍ଗିତରେ ସଂଖ୍ୟାଲଘୁଙ୍କ ଉପରେ ସାମ୍ପ୍ରଦାୟିକ ଆକ୍ରମଣ, ଭିଡ଼ ହତ୍ୟା, ଦଳିତ, ଆଦିବାସୀ ଓ ମହିଳାଙ୍କ ଉପରେ ବଢୁଥିବା ନିର୍ଯାତନା, ଖଣିଜ ଲୁଣ୍ଠନ ଏବଂ ଦୁର୍ନୀତି ଭଳି ପ୍ରସଙ୍ଗକୁ ସେ କଡ଼ା ସମାଲୋଚନା କରିଥିଲେ । ଏହାସହ ରାଜ୍ୟସଭା ନିର୍ବାଚନ ସମୟରେ କେନ୍ଦ୍ରୀୟ ସଂସ୍ଥାର ଭୟ ଦେଖାଇ ବିଜେପି ପକ୍ଷରୁ ହେଉଥିବା ଘୋଡ଼ା ବେପାରକୁ ମଧ୍ୟ ସେ ନିନ୍ଦା କରିବା ସହ ଗତ ଚାରି ମାସର କାର୍ଯ୍ୟ ବିବରଣୀ ଉପସ୍ଥାପନ କରିଥିଲେ ।
ବୈଠକରେ ଯୋଗଦେଇ ସିପିଆଇର ଜାତୀୟ ସମ୍ପାଦକ ରାମକୃଷ୍ଣ ପଣ୍ଡା ଆନ୍ତର୍ଜାତୀୟ ଓ ଜାତୀୟ ସମସ୍ୟା ଉପରେ ଆଲୋକପାତ କରିଥିଲେ । ସେ ଆମେରିକା ଓ ଇସ୍ରାଏଲର ମିଳିତ ସାମ୍ରାଜ୍ୟବାଦୀ ନୀତି, ମଧ୍ୟପ୍ରାଚ୍ୟରେ ଚାଲିଥିବା ନରସଂହାର, ଇରାନ ରାଷ୍ଟ୍ରପତିଙ୍କ ହତ୍ୟା ଏବଂ ଶିକ୍ଷାନୁଷ୍ଠାନ ଉପରେ ବୋମାମାଡ଼ ଭଳି ଘଟଣାକୁ ନିନ୍ଦା କରିଥିଲେ । ଭାରତ ପ୍ରସଙ୍ଗରେ ସେ କହିଥିଲେ ଯେ କେନ୍ଦ୍ର ସରକାର ଦେଶର ସ୍ୱାଧୀନ ବୈଦେଶିକ ନୀତିକୁ ଜଳାଞ୍ଜଳି ଦେଇ ଆମେରିକା ସହ ଏପରି ବାଣିଜ୍ୟ ଚୁକ୍ତି କରିଛନ୍ତି, ଯାହା ଭାରତର କୃଷକ, କୃଷି ଉତ୍ପାଦନ ଏବଂ କ୍ଷୁଦ୍ର ଓ ମଧ୍ୟମ ଶିଳ୍ପକୁ ସମ୍ପୂର୍ଣ୍ଣ ଧ୍ୱଂସ କରିଦେବ । ଏଥିସହିତ କେନ୍ଦ୍ରୀୟ ନିର୍ବାଚନ କମିଶନ ବିଜେପିର ଏଜେଣ୍ଟ ଭାବେ କାର୍ଯ୍ୟ କରି ଭୋଟର ତାଲିକାରୁ ସାଧାରଣ ଲୋକଙ୍କ ନାମ ବାଦ୍ ଦେବାର ଯେଉଁ ଷଡ଼ଯନ୍ତ୍ର କରୁଛନ୍ତି, ତାହାକୁ ବୁଥ ସ୍ତରରୁ ମୁକାବିଲା କରିବା ପାଇଁ ସେ ଦଳୀୟ କର୍ମୀଙ୍କୁ ଆହ୍ୱାନ ଦେଇଥିଲେ ।
ରାଜ୍ୟର ଜନସାଧାରଣଙ୍କ ସମସ୍ୟାକୁ ନେଇ ପାର୍ଟି ପକ୍ଷରୁ ଆଗାମୀ ଦିନ ପାଇଁ ଏକ ବ୍ୟାପକ ଆନ୍ଦୋଳନର ଯୋଜନା କରାଯାଇଛି । ଭୂମି ଅଧିକାର ଓ ମୌଳିକ ସୁରକ୍ଷା ପାଇଁ ଆସନ୍ତା ୨୦୨୬ ଏପ୍ରିଲ ୬ ତାରିଖରେ ଓଡ଼ିଶା ବିଧାନସଭା ସମ୍ମୁଖରେ ଏକ ବିଶାଳ ଗଣଧାରଣା ଦିଆଯିବ । ଏହି ଆନ୍ଦୋଳନକୁ ସଂଗଠିତ କରିବା ପାଇଁ ଜୟନ୍ତ ଦାସଙ୍କ ଆବାହକତ୍ୱରେ ଏକ କମିଟି ଗଠନ କରାଯାଇଛି ଏବଂ ଏଥିରେ ସୁନ୍ଦରଗଡ଼, କଳାହାଣ୍ଡି, କେନ୍ଦ୍ରାପଡ଼ା, ଝାରସୁଗୁଡ଼ା ଓ ବାଲେଶ୍ୱର ଜିଲ୍ଲାରୁ ଶହ ଶହ ବିସ୍ଥାପିତ ଲୋକ ଯୋଗଦେବେ । ସେହିପରି ମାର୍ଚ୍ଚ ୧୬ ଓ ୧୭ ତାରିଖରେ ପୁରୀଠାରେ “ଯୁବ ମହିଳା ଜାତୀୟ କନଭେନସନ” ଏବଂ ଭୁବନେଶ୍ୱରରେ “ଉତ୍କଳ ଭାରତ ଦଳିତ ଅଧିକାର ଆନ୍ଦୋଳନ”ର ରାଜ୍ୟସ୍ତରୀୟ ସମ୍ମିଳନୀ ଅନୁଷ୍ଠିତ ହେବାକୁ ନିଷ୍ପତ୍ତି ନିଆଯାଇଛି ।
ପଞ୍ଚାୟତ ଓ ସହରାଞ୍ଚଳରେ ଲୋକପ୍ରତିନିଧିଙ୍କ କ୍ଷମତାକୁ ସଂକୁଚିତ କରି ସରକାରୀ ଅଧିକାରୀଙ୍କ ସ୍ୱେଚ୍ଛାଚାରିତା ବୃଦ୍ଧି ପାଉଥିବା ଅଭିଯୋଗ କରି ପାର୍ଟି ମେ ମାସ ବ୍ୟାପୀ ପ୍ରତ୍ୟେକ ୱାର୍ଡ ସ୍ତରରେ ଆନ୍ଦୋଳନ କରିବ । ଏଥିସହିତ ସମଗ୍ର ଏପ୍ରିଲ ମାସରେ ରାଜ୍ୟର କୋଣ ଅନୁକୋଣରେ ଘରକୁ ଘର ଯାଇ ଗଣପାଣ୍ଠି ସଂଗ୍ରହ କରାଯିବ । ଏହି ବୈଠକରେ ପୂର୍ବତନ ରାଜ୍ୟ ସମ୍ପାଦକ ଆଶିଷ କାନୁନ୍ଗୋଙ୍କ ସମେତ ରାଜ୍ୟର ବିଭିନ୍ନ ଜିଲ୍ଲାରୁ ଆସିଥିବା ବହୁ ବରିଷ୍ଠ ନେତୃବୃନ୍ଦ ଯୋଗଦେଇ ପାର୍ଟିକୁ ସାଂଗଠନିକ ଭାବେ ସୁଦୃଢ଼ କରିବା ପାଇଁ ଆଲୋଚନା କରିଥିଲେ ।
