କଟକ (ବ୍ୟୁରୋ): ଓଡ଼ିଶାର ସାଂସ୍କୃତିକ ପ୍ରାଣକେନ୍ଦ୍ର ତଥା ଭାଇଚାରାର ସହର କଟକରେ ଆଜି ପୁଣି ଥରେ ଦେଶପ୍ରେମର ଏକ ଅପୂର୍ବ ଶିହରଣ ଦେଖିବାକୁ ମିଳିଛି। ଭାରତୀୟ ସ୍ୱାଧୀନତା ସଂଗ୍ରାମର ଦୁଇ ଔଜ୍ୱଲ୍ୟମାନ ନକ୍ଷତ୍ର ଆଜାଦ୍ ହିନ୍ଦ୍ ଫୌଜର ପ୍ରତିଷ୍ଠାତା ନେତାଜୀ ସୁବାଷ ଚନ୍ଦ୍ର ବୋଷ ଏବଂ ଜାତିର ଜନକ ମହାତ୍ମା ଗାନ୍ଧୀଙ୍କ ବିଚାରଧାରାକୁ ପାଥେୟ କରି ସ୍ଥାନୀୟ ମଙ୍ଗଳାବାଗ ସ୍ଥିତ ଇଣ୍ଟରନ୍ୟାସନାଲ କ୍ଲବ ପରିସରରେ ଏକ ବିଶାଳ ଐତିହାସିକ ଫଟୋ ପ୍ରଦର୍ଶନୀ ‘ଜଣେ ଯୋଦ୍ଧା ଓ ଜଣେ ସନ୍ଥ’ ଆୟୋଜିତ ହୋଇଯାଇଛି। ୨୩ ଜାନୁଆରୀ ନେତାଜୀଙ୍କ ଜୟନ୍ତୀରୁ ଆରମ୍ଭ ହୋଇଥିବା ଏହି ଭାବପୂର୍ଣ୍ଣ କାର୍ଯ୍ୟକ୍ରମ ଆସନ୍ତା ୩୦ ଜାନୁଆରୀ ଗାନ୍ଧୀଙ୍କ ବଳିଦାନ ଦିବସ ପର୍ଯ୍ୟନ୍ତ ଜାରି ରହିବ, ଯାହା ସହରବାସୀଙ୍କ ମଧ୍ୟରେ ଏକ ନୂତନ ଜାଗରଣ ସୃଷ୍ଟି କରିଛି।
ଭାରତର ସ୍ୱାଧୀନତା ସଂଗ୍ରାମ କହିଲେ ସାଧାରଣତଃ ଦୁଇଟି ଭିନ୍ନ ମାର୍ଗର କଥା ମନକୁ ଆସେ ଗୋଟିଏ ଗାନ୍ଧୀଙ୍କ ଅହିଂସା ଓ ସତ୍ୟାଗ୍ରହ ଏବଂ ଅନ୍ୟଟି ନେତାଜୀଙ୍କ ସାମରିକ ବିପ୍ଳବ ଓ ବଳିଦାନ। ଏହି ପ୍ରଦର୍ଶନୀର ମୁଖ୍ୟ ଉଦ୍ଦେଶ୍ୟ ହେଉଛି ଏହି ଦୁଇ ମହାନାୟକଙ୍କ ମଧ୍ୟରେ ଥିବା ପରସ୍ପର ପ୍ରତି ସମ୍ମାନ ଏବଂ ଦେଶ ପ୍ରତି ସେମାନଙ୍କର ଅତୁଟ ନିଷ୍ଠାକୁ ପ୍ରତିପାଦିତ କରିବା। ଏହି ବିଶାଳ ଆୟୋଜନ ପଛରେ ଗାନ୍ଧୀ ଶାନ୍ତି ପ୍ରତିଷ୍ଠାନର ସଙ୍ଗଠନ ସମ୍ପାଦକ ଶ୍ରୀ ହରିହର ସେନଙ୍କ ଅକ୍ଲାନ୍ତ ପରିଶ୍ରମ ଓ ପ୍ରତ୍ୟକ୍ଷ ତତ୍ତ୍ୱାବଧାନ ରହିଛି। ଶ୍ରୀ ସେନଙ୍କ ନିଷ୍ଠାପର ଉଦ୍ୟମ ଯୋଗୁଁ ଆଜି ବହୁ ଦୁର୍ଲଭ ଫଟୋଚିତ୍ର ସାଧାରଣ ଜନତାଙ୍କ ଦର୍ଶନ ପାଇଁ ଉପଲବ୍ଧ ହୋଇପାରିଛି, ଯାହା ସ୍ୱାଧୀନତା ଆନ୍ଦୋଳନର ଅନେକ ଅକୁହା ଅଧ୍ୟାୟକୁ ଲୋକଲୋଚନକୁ ଆଣିଛି।
ପ୍ରଦର୍ଶନୀରେ ସ୍ଥାନିତ ହୋଇଥିବା ପ୍ରତ୍ୟେକଟି ଫଟୋ ଏକ ଜୀବନ୍ତ ଦଲିଲ ସଦୃଶ। ଏଥିରେ ଗାନ୍ଧୀ ଓ ନେତାଜୀଙ୍କ ବିଭିନ୍ନ ସମୟର ସାକ୍ଷାତକାର, ଆନ୍ଦୋଳନର ରଣନୀତି ପ୍ରସ୍ତୁତି ଏବଂ ସେମାନଙ୍କ ଜୀବନର କଠିନ ସଂଘର୍ଷର ମୁହୂର୍ତ୍ତଗୁଡ଼ିକୁ ଅତି ସୁନ୍ଦର ଭାବେ ସଜାଯାଇଛି। ଏହି ଫଟୋଗୁଡ଼ିକ ଦର୍ଶକଙ୍କୁ ସେହି ସମୟର ଗୌରବମୟ ଇତିହାସକୁ ଅତି ନିକଟରୁ ଅନୁଭବ କରିବାର ସୁଯୋଗ ଦେଉଛି। ଇତିହାସ ପ୍ରେମୀମାନଙ୍କ ପାଇଁ ଏହା ଏକ ପାଠାଗାର ସଦୃଶ ହୋଇଥିବା ବେଳେ, ଆଜିର ଯୁବପିଢ଼ି ପାଇଁ ଏହା ଏକ ପ୍ରେରଣାର ଉତ୍ସ ସାଜିଛି। ଦେଶକୁ ସ୍ୱାଧୀନ କରିବା ପାଇଁ ଏହି ବୀରମାନେ କିପରି ସର୍ବସ୍ୱ ତ୍ୟାଗ କରିଥିଲେ, ତାହା ଦେଖି ଦର୍ଶକମାନେ ଭାବବିହ୍ୱଳ ହୋଇପଡ଼ୁଛନ୍ତି।
ସମାଜର ବିଭିନ୍ନ ବର୍ଗର ଲୋକ, ବୁଦ୍ଧିଜୀବୀ, ଶିକ୍ଷାବିତ୍ ଏବଂ ଛାତ୍ରଛାତ୍ରୀମାନେ ଏହି ପ୍ରଦର୍ଶନୀକୁ ବୁଲି ଦେଖିବା ସହ ଶ୍ରୀ ହରିହର ସେନଙ୍କ ଏହି ଅଭିନବ ପ୍ରୟାସକୁ ଉଚ୍ଚ ପ୍ରଶଂସା କରିଛନ୍ତି। ଆୟୋଜକଙ୍କ ପକ୍ଷରୁ କୁହାଯାଇଛି ଯେ, ବର୍ତ୍ତମାନର ସମୟରେ ଯେତେବେଳେ ମୂଲ୍ୟବୋଧର ଅବକ୍ଷୟ ଘଟୁଛି, ସେତେବେଳେ ଗାନ୍ଧୀ ଓ ନେତାଜୀଙ୍କ ଆଦର୍ଶ ହିଁ ସମାଜକୁ ସଠିକ୍ ଦିଗଦର୍ଶନ ଦେଇପାରିବ। ଏହି ପ୍ରଦର୍ଶନୀ କେବଳ ଇତିହାସର ଏକ ଝଲକ ନୁହେଁ, ବରଂ ଏହା ଆମର ପୂର୍ବପୁରୁଷଙ୍କ ତ୍ୟାଗକୁ ମନେ ପକାଇ ଦେଇ ଦେଶ ପ୍ରତି ନିଜର କର୍ତ୍ତବ୍ୟ ସମ୍ପାଦନ କରିବାକୁ ଏକ ଆହ୍ୱାନ।
ସମସ୍ତ ସଚେତନ ନାଗରିକଙ୍କୁ ଆୟୋଜକ କମିଟି ପକ୍ଷରୁ ବିନମ୍ର ଅନୁରୋଧ କରାଯାଇଛି ଯେ, ସେମାନେ ନିଜ ପରିବାର ଓ ପିଲାମାନଙ୍କ ସହ ଏହି ଐତିହାସିକ ପ୍ରଦର୍ଶନୀ ପରିଦର୍ଶନ କରନ୍ତୁ। ଜାନୁଆରୀ ୩୦ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ଏହି ପ୍ରଦର୍ଶନୀ ଆମ ସମସ୍ତଙ୍କ ପାଇଁ ଏକ ଗର୍ବ ଓ ଗୌରବର ବିଷୟ। ଶେଷରେ “ଜୟ ଜଗତ୍” ସ୍ଲୋଗାନ ସହ ଶ୍ରୀ ସେନ ସମସ୍ତଙ୍କ ସହଯୋଗ କାମନା କରିଛନ୍ତି।
