କଟକ, ସେପ୍ଟେମ୍ବର ୩୦, ୨୦୨୬: ଗ୍ରାମାଞ୍ଚଳର ମହିଳାମାନଙ୍କୁ ଦକ୍ଷତା ପ୍ରଦାନ କରି ଆର୍ଥିକ ଭାବେ ସ୍ୱାବଲମ୍ବୀ କରିବା ଲକ୍ଷ୍ୟରେ ଡାଲ୍ମିଆ ଭାରତ ଲିମିଟେଡ୍ର ସିଏସ୍ଆର୍ ଶାଖା ‘ଡାଲ୍ମିଆ ଭାରତ ଫାଉଣ୍ଡେସନ୍’ (ଡିବିଏଫ୍) ପକ୍ଷରୁ ଏକ ନୂଆ ମହିଳା ସଶକ୍ତିକରଣ କାର୍ଯ୍ୟକ୍ରମର ଶୁଭାରମ୍ଭ ହୋଇଯାଇଛି। ଯାଜପୁର ଜିଲ୍ଲାର ବଡ଼ଚଣା ବ୍ଲକ୍ ଅନ୍ତର୍ଗତ ପାରିଆଠାରେ ଏକ ନୂତନ ଟେଲରିଂ ପ୍ରଶିକ୍ଷଣ କେନ୍ଦ୍ର ଉଦ୍ଘାଟିତ ହୋଇଛି, ଯାହା ଡାଲ୍ମିଆ ସିମେଣ୍ଟର କଟକସ୍ଥିତ କପିଳାସ ସିମେଣ୍ଟ ୱାର୍କ୍ସ (କେସିଡବ୍ଲୁ) ନିକଟରେ ଅବସ୍ଥିତ।
ମହିଳାମାନେ ଯେପରି ଘରେ ରହି କାମ କରିପାରିବେ କିମ୍ବା ନିଜ ଅଞ୍ଚଳରେ ଏକ ଛୋଟ ବ୍ୟବସାୟ ଗଢ଼ିତୋଳି ପାରିବେ, ସେଥିପାଇଁ ଟେଲରିଂକୁ ଏକ ଅତି ସୁବିଧାଜନକ ଓ ଲାଭଦାୟକ କ୍ଷେତ୍ର ଭାବେ ବଛାଯାଇଛି। ଏହି କେନ୍ଦ୍ର ମାଧ୍ୟମରେ ଗ୍ରାମାଞ୍ଚଳର ମହିଳାମାନଙ୍କୁ ବ୍ୟାବହାରିକ ତାଲିମ ଦିଆଯାଇ ସେମାନଙ୍କ ପାଇଁ ନିଯୁକ୍ତି, ସ୍ୱ-ରୋଜଗାର ଏବଂ ସ୍ଥାୟୀ ଜୀବିକାର ନୂଆ ବାଟ ଖୋଲିବାକୁ ଲକ୍ଷ୍ୟ ରଖାଯାଇଛି।
ଏହି ସମାରୋହରେ ଆଖପାଖ ଅଞ୍ଚଳର ପ୍ରାୟ ୨୦୦ ଜଣ ମହିଳା, ଯୁବକ-ଯୁବତୀ, ସ୍ଥାନୀୟ ନେତୃବୃନ୍ଦ ଓ ସମାଜସେବୀ ଉପସ୍ଥିତ ଥିଲେ। ଅତିଥି ଭାବେ ବଡ଼ଚଣା ଏବିଡ଼ିଓ ଶ୍ରୀ ଜ୍ଞାନ ଦା, ଶ୍ରୀମତୀ ରଞ୍ଜିତା ରାଣୀ ପଟ୍ଟନାୟକ, ବଡ଼ଚଣା ବିପିଏମ୍ (ଓଏଲ୍ଏମ୍) ଶ୍ରୀ ଦେବୀ ପ୍ରସାଦ ଦାସ, କେସିଡବ୍ଲୁ ୟୁନିଟ୍ ହେଡ୍ ଶ୍ରୀ ବେଣୁଧର ବିଶ୍ୱାଳ, ପାରିଆ ସରପଞ୍ଚ ଶ୍ରୀ ଦେବବ୍ରତ ବେହେରା, ଆଇଡିବିଆଇ ବ୍ୟାଙ୍କ ପାରିଆ ଶାଖା ପରିଚାଳକ ଏବଂ ଡିବିଏଫ୍ ସିଏସ୍ଆର୍ ଟିମ୍ର ପ୍ରତିନିଧିମାନେ ଯୋଗଦେଇଥିଲେ।
ପ୍ରଥମ ପର୍ଯ୍ୟାୟରେ ୨୫ ଜଣ ମହିଳାଙ୍କୁ ନେଇ ପ୍ରଥମ ବ୍ୟାଚ୍ ଆରମ୍ଭ କରାଯାଇଛି, ଯାହାଙ୍କୁ ଶିକ୍ଷା ଦେବା ପାଇଁ ଜଣେ ଦକ୍ଷ ଓ ଯୋଗ୍ୟ ପ୍ରଶିକ୍ଷକଙ୍କୁ ନିୟୋଜିତ କରାଯାଇଛି। ଏହି ୩ ମାସିଆ କାର୍ଯ୍ୟକ୍ରମ ପ୍ରତିଦିନ ସକାଳ ୧୦ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଚାଲିବ, ଯେଉଁଥିରେ ପ୍ରଶିକ୍ଷାର୍ଥୀମାନେ ଟେଲରିଂର ବ୍ୟାବହାରିକ କୌଶଳ ଓ ହସ୍ତକଳା ଶିଖିପାରିବେ। ଏହି ବ୍ୟାଚ୍ ସମ୍ପୂର୍ଣ୍ଣ ହେବା ପରେ ପର୍ଯ୍ୟାୟକ୍ରମେ ନୂଆ ପ୍ରଶିକ୍ଷାର୍ଥୀଙ୍କୁ ସାମିଲ କରାଯିବ, ଯାହାଫଳରେ ଅଞ୍ଚଳର ବହୁ ସଂଖ୍ୟକ ମହିଳା ଏହି ସୁବିଧାର ସୁଫଳ ପାଇପାରିବେ।
ଏହି ଆଭିମୁଖ୍ୟ ସମ୍ପର୍କରେ ପ୍ରକାଶ କରି କେସିଡବ୍ଲୁ ୟୁନିଟ୍ ହେଡ୍ ଶ୍ରୀ ଦେବୀ ପ୍ରସାଦ ଦାସ କହିଛନ୍ତି ଯେ, ମହିଳାମାନଙ୍କୁ ଆବଶ୍ୟକୀୟ ଦକ୍ଷତାରେ ସମୃଦ୍ଧ କଲେ ସେମାନେ ଆର୍ଥିକ ସ୍ୱାଧୀନତା ହାସଲ କରିବା ସହ ନିଜ ପାଇଁ ସ୍ଥାୟୀ ଆୟର ମାଧ୍ୟମ ସୃଷ୍ଟି କରିପାରିବେ। ଏହି ସ୍ଥାନୀୟ ମଞ୍ଚ ମାଧ୍ୟମରେ ମହିଳାମାନେ ବ୍ୟାବହାରିକ ଶିକ୍ଷା ଲାଭ କରି ନିଜକୁ ଆର୍ଥିକ ଦୃଷ୍ଟିରୁ ମଜବୁତ୍ କରିପାରିବେ। ଆଗାମୀ ଦିନରେ ନିରନ୍ତର ନୂଆ ବ୍ୟାଚ୍ ଆରମ୍ଭ କରି ବ୍ୟାପକ ସାମାଜିକ ଓ ଆର୍ଥିକ ପରିବର୍ତ୍ତନ ଆଣିବା ପାଇଁ ଡିବିଏଫ୍ ନିଜର ପ୍ରୟାସ ଜାରି ରଖିବ।
ଗ୍ରାମୀଣ ମହିଳାଙ୍କ ଦକ୍ଷତା ବୃଦ୍ଧି ଓ ସଶକ୍ତିକରଣ ମାଧ୍ୟମରେ ସମାଜର ସର୍ବାଙ୍ଗୀନ ବିକାଶ ପାଇଁ ଡାଲ୍ମିଆ ଭାରତ ଫାଉଣ୍ଡେସନ୍ ବଦ୍ଧପରିକର। ମହିଳାମାନଙ୍କୁ ଆୟକାରୀ କୌଶଳ ଶିଖାଇ ଏହି କାର୍ଯ୍ୟକ୍ରମ ସେମାନଙ୍କର ସାମାଜିକ-ଆର୍ଥିକ ଭାଗୀଦାରିକୁ ଅଧିକ ସୁଦୃଢ଼ କରିବ।
