ଭୁବନେଶ୍ୱର, ୬ ଅଗଷ୍ଟ ୨୦୨୬: ମଣିପାଲ ହସ୍ପିଟାଲ ଭୁବନେଶ୍ୱରର କାର୍ଡିଓଥୋରାସିକ୍ ଭାସ୍କୁଲାର ସର୍ଜରୀ ବିଭାଗର ବରିଷ୍ଠ ପରାମର୍ଶଦାତା ଡାକ୍ତର ଜିତେନ୍ଦ୍ର ନାଥ ପଟ୍ଟନାୟକଙ୍କ ନେତୃତ୍ୱରେ ଡାକ୍ତରୀ ଟିମ୍ ଜଣେ ୩୨ ବର୍ଷୀୟା ମହିଳା, ସୁସ୍ମିତା ସେଠୀଙ୍କର ଏକ ଜଟିଳ ଓପନ୍-ହାର୍ଟ ସର୍ଜରୀ ସଫଳତାର ସହ ସମ୍ପନ୍ନ କରିଛନ୍ତି। ରକ୍ତହୀନତା ଜନିତ ଆନୁବଂଶିକ ରୋଗ ‘ସିକଲ୍ ସେଲ୍ ଆନେମିଆ’ ଥିବା ସତ୍ତ୍ୱେ, ଡାକ୍ତରମାନେ ଅତ୍ୟନ୍ତ ନିପୁଣତା ଓ ସଠିକ୍ ପରିଚାଳନା ମାଧ୍ୟମରେ ତାଙ୍କର ଦୁଇଟି ପ୍ରମୁଖ ହୃଦ୍ରୋଗର ଚିକିତ୍ସା କରି ନୂଆ ଜୀବନ ଦେଇଛନ୍ତି।
ମିସ୍ ସୁସ୍ମିତା ଗତ କିଛି ବର୍ଷ ଧରି ଶ୍ୱାସକ୍ରିୟାରେ କଷ୍ଟ, ମୁହଁ ଓ ପାଦ ଫୁଲିଯିବା ଏବଂ ଅଚେତ ହୋଇପଡ଼ିବା ଭଳି ସମସ୍ୟାର ସମ୍ମୁଖୀନ ହେଉଥିଲେ। ମଣିପାଲ ହସ୍ପିଟାଲରେ ପରୀକ୍ଷା ପରେ ଜଣାପଡ଼ିଥିଲା ଯେ ତାଙ୍କ ହୃଦୟରେ ଜନ୍ମଗତ ଛିଦ୍ର (ଆଟ୍ରିଆଲ୍ ସେପ୍ଟାଲ୍ ଡିଫେକ୍ଟ) ରହିଥିବା ସହ ମାଇଟ୍ରାଲ୍ ଭାଲ୍ଭ୍ ଅତ୍ୟଧିକ ଲିକ୍ କରୁଥିଲା, ଯାହା ଫଳରେ ତାଙ୍କ ହାର୍ଟ ଫେଲ୍ୟୁଅର୍ ଆଡ଼କୁ ଗତି କରୁଥିଲା। ଏହି ସ୍ଥିତିରେ ହୃଦୟର ଛିଦ୍ର ବନ୍ଦ କରିବା ଏବଂ ନଷ୍ଟ ଭାଲ୍ଭକୁ ବଦଳାଇବା ପାଇଁ ଓପନ୍-ହାର୍ଟ ସର୍ଜରୀ ଅପରିହାର୍ଯ୍ୟ ହୋଇପଡ଼ିଥିଲା।
ସର୍ଜରୀ ପୂର୍ବରୁ ସୁସ୍ମିତାଙ୍କ ଶରୀରରେ ୬୯% ସିକଲ୍ ରକ୍ତ କୋଷ ଥିବା ଚିହ୍ନଟ ହୋଇଥିଲା। ଓପନ୍-ହାର୍ଟ ସର୍ଜରୀ ସମୟରେ ‘ହାର୍ଟ-ଲଙ୍ଗ ମେସିନ୍’ ବ୍ୟବହାର ହେଉଥିବାରୁ ଏହି ବଙ୍କା ଲାଲ୍ ରକ୍ତ କଣିକାଗୁଡ଼ିକ ଶୀଘ୍ର ଭାଙ୍ଗିଯିବା ଏବଂ ଜୀବନପ୍ରତି ବିପଦ ସୃଷ୍ଟି ହେବାର ବଡ଼ ଆଶଙ୍କା ଥିଲା। ଏହି ବିପଦକୁ ଏଡ଼ାଇବା ପାଇଁ ଅପରେସନ୍ର ଦୁଇ ଦିନ ପୂର୍ବରୁ ଟ୍ରାନ୍ସଫ୍ୟୁଜନ୍ ମେଡିସିନ୍ ବିଭାଗର ଡାକ୍ତର ଦେବୀ ପ୍ରସାଦ ଆଚାର୍ଯ୍ୟ ‘ଏକ୍ସଚେଞ୍ଜ ଟ୍ରାନ୍ସଫ୍ୟୁଜନ୍’ ମାଧ୍ୟମରେ ସିକଲ୍ କୋଷକୁ ୨୫%-୩୦% କୁ କମାଇଥିଲେ।
ଏହାପରେ ସିଟିଭିଏସ, ଆନେସ୍ଥେସିଓଲୋଜି, ପରଫ୍ୟୁଜନ୍ ଏବଂ ଟ୍ରାନ୍ସଫ୍ୟୁଜନ୍ ଟିମ୍ର ସମନ୍ୱିତ ଉଦ୍ୟମରେ ସୁରକ୍ଷିତ ଭାବେ ହୃଦୟର ଛିଦ୍ରକୁ ପ୍ୟାଚ୍ ଦ୍ୱାରା ବନ୍ଦ କରାଯିବା ସହ ମାଇଟ୍ରାଲ୍ ଭାଲ୍ଭକୁ ବଦଳାଯାଇଥିଲା। ଅପରେସନ୍ ପରେ ମହିଳା ଜଣକ ସମ୍ପୂର୍ଣ୍ଣ ସୁସ୍ଥ ହୋଇଥିବା ବେଳେ, ତାଙ୍କର ହୃଦ୍ରୋଗ ସମ୍ପୂର୍ଣ୍ଣ ଆରୋଗ୍ୟ ହୋଇଛି ଏବଂ ଆଗାମୀ ସିକଲ୍ ସେଲ୍ ପରିଚାଳନା ପାଇଁ ତାଙ୍କୁ ହେମାଟୋଲୋଜି ବିଭାଗକୁ ସ୍ଥାନାନ୍ତର କରାଯାଇଛି।
