ବଲାଙ୍ଗୀର, ୬ ଅଗଷ୍ଟ: ପଶ୍ଚିମ ଓଡ଼ିଶାର ଶିକ୍ଷା କ୍ଷେତ୍ରକୁ ସମୃଦ୍ଧ କରିବା ସହ ନବସୃଜନ, ଗବେଷଣା ଓ ଉଦ୍ୟମିତାକୁ ଏକ ନୂଆ ବେଗ ଦେବା ପାଇଁ ରାଜେନ୍ଦ୍ର ବିଶ୍ୱବିଦ୍ୟାଳୟ ଏବଂ ଦେଶର ଅଗ୍ରଣୀ ଅନୁଷ୍ଠାନ ଆଇଆଇଟି ଭୁବନେଶ୍ୱର ମଧ୍ୟରେ ଏକ ଐତିହାସିକ ବୁଝାମଣା ପତ୍ର ସ୍ୱାକ୍ଷରିତ ହୋଇଛି। ଦୂରଦର୍ଶୀ କୁଳପତି ପ୍ରଫେସର ବିଭୂତି ଭୂଷଣ ମଲ୍ଲିକଙ୍କ ପ୍ରତ୍ୟକ୍ଷ ମାର୍ଗଦର୍ଶନ ଓ କୁଶଳ ନେତୃତ୍ୱରେ ସାକାର ହୋଇଥିବା ଏହି ଚୁକ୍ତି କଳାହାଣ୍ଡି-ବଲାଙ୍ଗୀର-କୋରାପୁଟ (କେବିକେ) ଅଞ୍ଚଳର ଛାତ୍ରଛାତ୍ରୀ ଓ ଗବେଷକମାନଙ୍କ ପାଇଁ ଉଚ୍ଚଶିକ୍ଷାର ସୁବର୍ଣ୍ଣ ସୁଯୋଗ ସୃଷ୍ଟି କରିବ।
ଏହି ସହଯୋଗିତା ଅଧୀନରେ ରାଜେନ୍ଦ୍ର ବିଶ୍ୱବିଦ୍ୟାଳୟ ପରିସରରେ ଇନ୍କ୍ୟୁବେସନ୍ ଓ ଉଦ୍ୟମିତା କେନ୍ଦ୍ର ସମେତ ଶ୍ରମ ଓ ପ୍ରବାସ ଅଧ୍ୟୟନ ପାଇଁ ଏକ ଅତ୍ୟାଧୁନିକ ଉତ୍କର୍ଷ କେନ୍ଦ୍ର ସ୍ଥାପନ କରାଯିବ। ଏହା ଦ୍ୱାରା ନୀତିନିର୍ଦ୍ଧାରଣ ଗବେଷଣା, ଆନ୍ତଃବିଷୟକ ଶିକ୍ଷା ଏବଂ ନୂତନ ଷ୍ଟାର୍ଟଅପ୍ ସଂସ୍କୃତି ପ୍ରୋତ୍ସାହିତ ହେବ। ଏତଦ୍ବ୍ୟତୀତ, ଉଭୟ ଅନୁଷ୍ଠାନ କୃତ୍ରିମ ବୁଦ୍ଧିମତ୍ତା, କଗ୍ନିଟିଭ୍ ସାଇନ୍ସ, ଦର୍ଶନ, ଭୂଗୋଳ, ଥର୍ମାଲ୍ କ୍ୟାମୋଫ୍ଲାଜ୍ ଟେକ୍ନୋଲୋଜି, ଉନ୍ନତ ପତଳା-ସ୍ତରୀୟ ପଦାର୍ଥ ବିଜ୍ଞାନ ଏବଂ ଜୈବ ବର୍ଜ୍ୟ ପରିଚାଳନା ଭଳି ଯୁଗୋପଯୋଗୀ ବିଷୟରେ ମିଳିତ ଗବେଷଣା, ପ୍ରକଳ୍ପ ସମ୍ପାଦନ, ଶିକ୍ଷାବିତ୍ ବିନିମୟ ଓ ଜର୍ଣ୍ଣାଲ୍ ପ୍ରକାଶନକୁ ଆଗେଇ ନେବେ।
ରାଜେନ୍ଦ୍ର ବିଶ୍ୱବିଦ୍ୟାଳୟର ଛାତ୍ରଛାତ୍ରୀମାନେ ଆଇଆଇଟି ଭୁବନେଶ୍ୱରରେ ଇଣ୍ଟର୍ନସିପ୍, ପ୍ରଶିକ୍ଷଣ ଓ କ୍ଷୁଦ୍ର ଗବେଷଣା ସୁଯୋଗ ପାଇବେ। ଏଥିସହ ଆଇଆଇଟି ଭୁବନେଶ୍ୱରର ‘ଏସ୍.କେ.ବି.ଇ.ଟି. କେନ୍ଦ୍ର’, ‘କେନ୍ଦ୍ରୀୟ ଯନ୍ତ୍ରପାତି ସୁବିଧା କେନ୍ଦ୍ର’, ‘ଉନ୍ନତ ଭୂ-ରାସାୟନିକ ଗବେଷଣାଗାର’ ଏବଂ ‘ଜ୍ଞାନାତ୍ମକ, ବ୍ୟବହାରିକ ଓ ମନୋ-ଭାଷାବିଜ୍ଞାନ ଗବେଷଣାଗାର’ର ଇଇଜି ଏବଂ ଏଫଏନଆଇଆରଏସ ଭଳି ଉନ୍ନତ ମସ୍ତିଷ୍କ ପରୀକ୍ଷା ସୁବିଧାର ସିଧାସଳଖ ଲାଭ ବିଶ୍ୱବିଦ୍ୟାଳୟର ଗବେଷକମାନେ ଉଠାଇପାରିବେ।
ଜାତୀୟ ଶିକ୍ଷା ନୀତି-୨୦୨୦ ଅନୁଯାୟୀ ଡାଟା ସାଇନ୍ସରେ ବି.ଏସ୍.ସି., କୃତ୍ରିମ ବୁଦ୍ଧିମତ୍ତା ଓ ମେସିନ୍ ଲର୍ଣ୍ଣିଂରେ ଯୁଗ୍ମ ଏମ୍.ଟେକ୍. ଏବଂ କ୍ଲାଇମେଟ୍ ଫାଇନାନ୍ସ ଓ ସସ୍ଥାୟୀ ଉଦ୍ୟମିତା କ୍ଷେତ୍ରରେ ଯୁଗ୍ମ ଡିପ୍ଲୋମା ପାଠ୍ୟକ୍ରମ ପ୍ରବର୍ତ୍ତନ କରିବାର ସମ୍ଭାବନା ରହିଛି।
କୁଳପତି ପ୍ରଫେସର ବିଭୂତି ଭୂଷଣ ମଲ୍ଲିକଙ୍କ ମତରେ, ଏହି ମିଳିତ ପ୍ରଚେଷ୍ଟା ରାଜେନ୍ଦ୍ର ବିଶ୍ୱବିଦ୍ୟାଳୟକୁ ଜାତୀୟ ସ୍ତରର ଏକ ପ୍ରମୁଖ ଗବେଷଣା ଓ ଉଚ୍ଚଶିକ୍ଷା କେନ୍ଦ୍ରରେ ପରିଣତ କରିବ। ତିନି ବର୍ଷ ପାଇଁ ସ୍ୱାକ୍ଷରିତ ଏହି ବୁଝାମଣା ପତ୍ର ସମଗ୍ର ପଶ୍ଚିମ ଓଡ଼ିଶାର ଶିକ୍ଷା, ଗବେଷଣା ଓ କୌଶଳ ବିକାଶ କ୍ଷେତ୍ରରେ ଏକ ନୂତନ ପ୍ରଭାତ ଆଣିଦେବ।
