ଭୁବନେଶ୍ୱର, ଅଗଷ୍ଟ ୨୦: ଫୁଲନଖରାସ୍ଥିତ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ (କ୍ୟାମ୍ପସ-୨)ର ମାନସିକ ରୋଗ ବିଭାଗ ପକ୍ଷରୁ ଅତ୍ୟାଧୁନିକ ‘ମୋଡିଫାଇଡ୍ ଇସିଟି’ (ଇଲେକ୍ଟ୍ରୋକନ୍ଭଲସିଭ୍ ଥେରାପି) ସେବା ଆରମ୍ଭ କରାଯାଇଛି। ସ୍କିଜୋଫ୍ରେନିଆରେ ଆକ୍ରାନ୍ତ ଜଣେ ରୋଗୀଙ୍କଠାରେ ଏହି ଚିକିତ୍ସା ସଫଳତାର ସହ ପ୍ରୟୋଗ କରାଯିବା ପରେ ଏହି ସେବାକୁ ବିଧିବଦ୍ଧ ଭାବେ ଚାଲୁ କରାଯାଇଛି, ଯାହା ଆଗାମୀ ଦିନରେ ଅଞ୍ଚଳର ମାନସିକ ସ୍ୱାସ୍ଥ୍ୟସେବାରେ ନୂତନ ଦିଗନ୍ତ ସୃଷ୍ଟି କରିବ।
ମାନସିକ ରୋଗ ବିଭାଗର ମୁଖ୍ୟ ପ୍ରଫେସର (ଡାକ୍ତର) ଭବାନୀ ଶଙ୍କର ଏହି ଅବସରରେ କହିଛନ୍ତି ଯେ, ଗୁରୁତର ମାନସିକ ବିଭ୍ରାଟରେ ପୀଡ଼ିତ ରୋଗୀଙ୍କ ପାଇଁ ମୋଡିଫାଇଡ୍ ଇସିଟି ଏକ ଅତ୍ୟନ୍ତ ନିରାପଦ ଓ ଫଳପ୍ରଦ ପଦ୍ଧତି। ସାଧାରଣ ନିଶ୍ଚେତନ ଓ ମାଂସପେଶୀ ଶିଥିଳକରଣ ପ୍ରକ୍ରିୟାରେ ଏହି ଚିକିତ୍ସା ଦିଆଯାଉଥିବାରୁ ଏହା ପାରମ୍ପରିକ ଇସିଟି ତୁଳନାରେ ରୋଗୀଙ୍କୁ ଅଧିକ ଆରାମ ଓ ସୁରକ୍ଷା ଯୋଗାଇଥାଏ। ଏହି ସେବାର ଶୁଭାରମ୍ଭ ପାଇଁ ସେ ମାନସିକ ରୋଗ ଓ ନିଶ୍ଚେତନ ବିଭାଗର ମିଳିତ ଟିମ୍କୁ ପ୍ରଶଂସା କରିବା ସହ କ୍ୟାମ୍ପସ-୨ର ଡିନ୍ ପ୍ରଫେସର (ଡାକ୍ତର) ସ୍ନିଗ୍ଧା ପ୍ରଭା ମିଶ୍ର ଏବଂ ମେଡିକାଲ୍ ସୁପରିନ୍ଟେଣ୍ଡେଣ୍ଟ ପ୍ରଫେସର (ଡାକ୍ତର) ରାଜେଶ କୁମାର ଲେଙ୍କାଙ୍କ ସହଯୋଗ ଓ ନେତୃତ୍ୱ ପାଇଁ କୃତଜ୍ଞତା ଜଣାଇଥିଲେ। ସେହିପରି ବିଭାଗୀୟ ଆସୋସିଏଟ୍ ପ୍ରଫେସର (ଡାକ୍ତର) ଲଗ୍ନଜିତ୍ ଦାଶ ପ୍ରକାଶ କରିଛନ୍ତି ଯେ, ଏହି ନୂତନ ୟୁନିଟ୍ ସମ୍ପୂର୍ଣ୍ଣ ସୁସଜ୍ଜିତ ହୋଇ କାର୍ଯ୍ୟକ୍ଷମ ହୋଇଥିବାରୁ ଗୁରୁତର ମାନସିକ ଅସୁସ୍ଥତାରେ ଥିବା ରୋଗୀଙ୍କୁ ତୁରନ୍ତ ଓ ଉନ୍ନତ ଚିକିତ୍ସା ସୁବିଧା ମିଳିପାରିବ।
