ଭୁବନେଶ୍ୱର, ୫ ଜୁଲାଇ (୨୦୨୬): ରାଜ୍ୟ ତଥା ସାରା ଦେଶରେ ଶିକ୍ଷାର ବ୍ୟବସାୟୀକରଣ, କ୍ରମାଗତ ଅବନତି ଏବଂ ପରିବେଶର ସୁରକ୍ଷା ଭଳି ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ନେଇ ସାମାଜିକ ସଂଗଠନ ‘ଉଠ ଓଡ଼ିଆ’ ପକ୍ଷରୁ ପ୍ରତିବାଦର ସ୍ୱର ତୀବ୍ର ହେବାରେ ଲାଗିଛି। ଯୁବବର୍ଗଙ୍କ ଅଧିକାର ଓ ସେମାନଙ୍କ ଭବିଷ୍ୟତକୁ ସରକାରଙ୍କ ଭୁଲ୍ ନୀତି ଯୋଗୁଁ ଅନ୍ଧାର ମଧ୍ୟକୁ ଠେଲି ଦିଆଯାଉଥିବା ଅଭିଯୋଗ କରି ଭୁବନେଶ୍ୱରଠାରେ ଏକ ଦିନିକିଆ ଗଣ ଉପବାସ ଅନୁଷ୍ଠିତ ହୋଇଯାଇଛି। ସରକାରଙ୍କ ଏହି ନୀତି ବିରୋଧରେ ଆଗାମୀ ଦିନରେ ଆନ୍ଦୋଳନକୁ ଆହୁରି ବ୍ୟାପକ କରିବା ପାଇଁ ସଂଗଠନ ଆହ୍ୱାନ ଦେଇଛି। ଏହି ପରିପ୍ରେକ୍ଷୀରେ ଆଗାମୀ ୧୧ ଓ ୧୨ ତାରିଖରେ ରାଜଧାନୀ ଭୁବନେଶ୍ୱରରେ ଏକ ଦୁଇ ଦିନିଆ ସତ୍ୟାଗ୍ରହ ଆୟୋଜନ କରାଯିବ ବୋଲି ସଂଗଠନ ପକ୍ଷରୁ ସୂଚନା ଦିଆଯାଇଛି।
ଏହି ସମାବେଶରେ ଶିକ୍ଷା କ୍ଷେତ୍ରରେ ବିଗତ ଦିନରେ ଘଟିଥିବା ବଡ଼ ଧରଣର ଦୁର୍ନୀତି ଓ ଅନିୟମିତତାକୁ କଡ଼ା ଭାଷାରେ ନିନ୍ଦା କରାଯାଇଛି। କେନ୍ଦ୍ର ସରକାରଙ୍କ ଅଧୀନରେ ଆୟୋଜିତ ନିଟ୍ ପରୀକ୍ଷା ପ୍ରଶ୍ନପତ୍ର ଲିକ୍, ସିବିଏସଇ ମୂଲ୍ୟାୟନ ଘୋଟାଲା ଏବଂ ଦେଶରେ ପାଖାପାଖି ୯୦ ହଜାର ସରକାରୀ ବିଦ୍ୟାଳୟ ବନ୍ଦ କରାଯିବା ନିଷ୍ପତ୍ତି ଉପରେ କ୍ଷୋଭ ପ୍ରକାଶ କରାଯାଇଛି। ଏହି ପରୀକ୍ଷା ଦୁର୍ନୀତି ଓ ମାନସିକ ଚାପ ଯୋଗୁଁ ଦେଶରେ ୨୦ରୁ ଅଧିକ ଛାତ୍ରଛାତ୍ରୀ ଆତ୍ମହତ୍ୟା କରିବା ଭଳି ଦୁଃଖଦ ଘଟଣା ସାମ୍ନାକୁ ଆସିଛି। ସେହିପରି ଓଡ଼ିଶା ପ୍ରସଙ୍ଗରେ ସଂଗଠନର କର୍ମକର୍ତ୍ତାମାନେ କହିଛନ୍ତି ଯେ, ଶିକ୍ଷାବର୍ଷର ତିନି ମାସ ବିତିଯିବା ପରେ ମଧ୍ୟ ଛାତ୍ରଛାତ୍ରୀଙ୍କୁ ସଠିକ୍ ପାଠ୍ୟପୁସ୍ତକ ମିଳିପାରି ନାହିଁ, ବରଂ ଅନେକ ବିଳମ୍ବରେ ତ୍ରୁଟିପୂର୍ଣ୍ଣ ବହି ଯୋଗାଇ ଦିଆଯାଇଛି। ବିଭିନ୍ନ ସରକାରୀ ନିଯୁକ୍ତିଭିତ୍ତିକ ପ୍ରବେଶିକା ପରୀକ୍ଷାରେ ବାରମ୍ବାର ପ୍ରଶ୍ନପତ୍ର ପ୍ରଘଟ ହେବା କାରଣରୁ ଯୁବପିଢ଼ି ବର୍ତ୍ତମାନର ବ୍ୟବସ୍ଥା ଉପରୁ ସମ୍ପୂର୍ଣ୍ଣ ବିଶ୍ୱାସ ହରାଇ ସାରିଲେଣି। ଏସବୁ ଘଟଣା ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଚରମ ଉଦାସୀନତାକୁ ଦର୍ଶାଉଛି ବୋଲି ସଂଗଠନ ସ୍ପଷ୍ଟ କରିଛି।
ଅନ୍ୟପଟେ, ଦେଶର ବିଶିଷ୍ଟ ବୈଜ୍ଞାନିକ ତଥା ପରିବେଶବିତ୍ ସୋନମ୍ ୱାଂଚୁକ୍ ଶିକ୍ଷା ସଂସ୍କାର ଏବଂ ପରିବେଶ ସୁରକ୍ଷା ଦାବି କରି ନୂଆଦିଲ୍ଲୀର ଜନ୍ତର ମନ୍ତରଠାରେ ଗତ ୮ ଦିନ ଧରି ଚଳାଇଥିବା ଆମରଣ ଅନଶନ ପ୍ରତି ‘ଉଠ ଓଡ଼ିଆ’ ପୂର୍ଣ୍ଣ ସମର୍ଥନ ଘୋଷଣା କରିଛି। ଭୁବନେଶ୍ୱରର ପ୍ରତିବାଦ ସଭାରେ ସଂଗଠନର ପ୍ରମୁଖ ସଦସ୍ୟ ଜ୍ଞାନ ରଞ୍ଜନ ଦାସ, ସୌମ୍ୟରଞ୍ଜନ ମହାନ୍ତି, ଅଶୋକ ଜେନା, ଦୂର୍ଗା ଦାସ, ସମୀର ରାଉତ, ରମେଶ ଚନ୍ଦ୍ର ଭୋଇ, ଶ୍ରୀମନ୍ତ ମହାନ୍ତି, ଡଃ ରତିକାନ୍ତ ନାୟକ, ସୁରେଶ ସ୍ୱାଇଁ ଏବଂ ଦେବୀ ପ୍ରସନ୍ନ ରଥଙ୍କ ସମେତ ୩୦ ଜଣ ସଦସ୍ୟ ସିଧାସଳଖ ସାମିଲ ହୋଇଥିଲେ। ଏଥି ସହିତ ଓଡ଼ିଶା ତଥା ଓଡ଼ିଶା ବାହାରେ ଥିବା ସଂଗଠନର ଅନେକ ସଦସ୍ୟ ନିଜ ନିଜ ସ୍ଥାନରେ ଏକ ଦିନିଆ ଉପବାସ ପାଳନ କରି ଏହି ଆନ୍ଦୋଳନକୁ ସମର୍ଥନ କରିଛନ୍ତି। ଏହି ଅବସରରେ ବରିଷ୍ଠ ସାମ୍ବାଦିକ ରବି ଦାସ ଅନଶନ ସ୍ଥଳରେ ପହଞ୍ଚି ‘ଉଠ ଓଡ଼ିଆ’ର ଏହି ଜନହିତକର ପ୍ରୟାସକୁ ସମର୍ଥନ ଜଣାଇବା ସହ ଦେଶର ସ୍ୱାର୍ଥ ପାଇଁ ସୋନମ୍ ୱାଂଚୁକ୍ଙ୍କ ଲଢ଼େଇକୁ ଉଚ୍ଚ ପ୍ରଶଂସା କରିଥିଲେ।
