ସମ୍ବଲପୁର, ୪ ଜାନୁଆରୀ ୨୦୨୬
ରାଜ୍ୟରେ ଧାନ ସଂଗ୍ରହ ଓ ଟୋକନ ସମସ୍ୟାକୁ ନେଇ ଚାଷୀଙ୍କ ଆନ୍ଦୋଳନ ଜାରି ରହିଥିବା ବେଳେ, ଉପମୁଖ୍ୟମନ୍ତ୍ରୀ ତଥା କୃଷିମନ୍ତ୍ରୀ କନକବର୍ଦ୍ଧନ ସିଂହଦେଓଙ୍କ ଏକ ମନ୍ତବ୍ୟକୁ ନେଇ ପଶ୍ଚିମ ଓଡ଼ିଶାରେ ଚାଷୀମାନଙ୍କ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ଚାଷୀଙ୍କ ସମସ୍ୟାର ସମାଧାନ କରିବା ପରିବର୍ତ୍ତେ ସରକାର ସେମାନଙ୍କୁ ଅପମାନିତ କରୁଥିବା ଅଭିଯୋଗ ହୋଇଛି।
ବରଗଡ଼ ଧନୁଯାତ୍ରା ମଞ୍ଚରେ ଉପମୁଖ୍ୟମନ୍ତ୍ରୀ ମହାରାଜା କଂସଙ୍କୁ ସମ୍ବୋଧନ କରି କହିଥିଲେ, “ନାଟକ କରିବାର ଅଛି ତ ମହାରାଜ ଆପଣଙ୍କ ଦରବାରକୁ ଆସି ଲୋକଙ୍କ ସାମ୍ନା କଲେ ଭଲ ହେବ, ରୋଡ୍ବ୍ଲକ୍ କରି ଲୋକଙ୍କୁ ହଇରାଣ କରିବା ଉଚିତ ନୁହେଁ”| ଚାଷୀମାନେ ନିଜର ହକ ପାଇଁ କରୁଥିବା ଆନ୍ଦୋଳନକୁ ମନ୍ତ୍ରୀ ‘ନାଟକ’ ବୋଲି ଆକ୍ଷେପ କରିଥିବାରୁ ଏହାକୁ ନେଇ ବିବାଦ ଉଗ୍ର ରୂପ ଧାରଣ କରିଛି।
ଏହି ମନ୍ତବ୍ୟ ପରେ ବିଭିନ୍ନ ଚାଷୀ ସଙ୍ଗଠନ ତୀବ୍ର ନିନ୍ଦା କରିଛନ୍ତି:
- ଅଶୋକ ପ୍ରଧାନ (ସମ୍ବଲପୁର): “ପଶ୍ଚିମ ଓଡ଼ିଶାର ଜଣେ ବ୍ୟକ୍ତି କୃଷିମନ୍ତ୍ରୀ ହୋଇ ଚାଷୀଙ୍କ ଦୁଃଖ ନବୁଝିବା ଦୁର୍ଭାଗ୍ୟଜନକ। ଚାଷୀ ନିଜ ଇଚ୍ଛାରେ ରାସ୍ତାକୁ ଓହ୍ଲାଇ ନାହାନ୍ତି, ସରକାରୀ ଅବ୍ୟବସ୍ଥା ତାଙ୍କୁ ବାଧ୍ୟ କରିଛି।”
- ସୋନାଲି ବିଶି (ସୁବର୍ଣ୍ଣପୁର): “ଏହା ଚାଷୀଙ୍କ ପ୍ରତି ସରକାରଙ୍କ ଏକ ଖୋଲାଖୋଲି ଧମକ। ଲୋକଙ୍କ ସରକାର କହି ଚାଷୀଙ୍କୁ ଏଭଳି ଅପମାନିତ କରିବା ସମ୍ବେଦନହୀନତାର ପରିଚୟ।”
- ହର ବଣିଆ (ବରଗଡ଼): “ବରଗଡ଼ ଧନୁଯାତ୍ରା ଭଳି ଏକ ପବିତ୍ର ମଞ୍ଚକୁ ଚାଷୀ ବିରୋଧୀ ମଞ୍ଚରେ ପରିଣତ କରିଦିଆଗଲା, ଯାହା ଅତ୍ୟନ୍ତ ଦୁଃଖଦାୟକ।”
ମଣ୍ଡିରେ ଅଚଳାବସ୍ଥା: ମାନସିକ ଚାପରେ ଚାଷୀ
ଚଳିତ ବର୍ଷ ଧାନ ସଂଗ୍ରହରେ ଯେଭଳି ବିଭ୍ରାଟ ଦେଖାଦେଇଛି, ତାହା ପୂର୍ବରୁ କେବେ ହୋଇନଥିଲା। ପ୍ରଶାସନର ନିଷ୍କ୍ରିୟତା ଯୋଗୁଁ ଚାଷୀ ଆର୍ଥିକ ଅବରୋଧ କରିବାକୁ ବାଧ୍ୟ ହେଉଛନ୍ତି। ମଣ୍ଡି ଖୋଲିବାର ମାସେ ପରେ ବି ଟୋକନ ସମସ୍ୟା ସମାଧାନ ହୋଇନାହିଁ। ଅନ୍ୟପଟେ, ମିଲର୍ସମାନେ ସେମାନଙ୍କ ଦାବି ପୂରଣ ନହେଲେ ଜାନୁଆରୀ ୫ ତାରିଖରୁ ଧାନ ଉଠାଇବେ ନାହିଁ ବୋଲି ଚେତାବନୀ ଦେଇଛନ୍ତି। ଏଭଳି ସ୍ଥିତିରେ ଚାଷୀଙ୍କ କଷ୍ଟଲବ୍ଧ ଧାନ ଖୋଲା ଆକାଶ ତଳେ ପଡ଼ି ରହିଛି।
ଉପମୁଖ୍ୟମନ୍ତ୍ରୀଙ୍କ ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ସାଧାରଣ ଜନତା ମଧ୍ୟ ଏହାକୁ ସମାଲୋଚନା କରୁଛନ୍ତି। ଆଗାମୀ ଦିନରେ ଯଦି ସମସ୍ୟାର ସମାଧାନ ନହୁଏ, ତେବେ ଆନ୍ଦୋଳନ ଆହୁରି ବ୍ୟାପକ ହେବାର ଆଶଙ୍କା ରହିଛି।
