ଡାକ୍ତରଖାନାକୁ ମଣିଷ ଯାଏ ଭରସା ନେଇ, ନୂଆ ଜୀବନ ପାଇବା ଆଶାରେ। ହେଲେ ଯଦି ଏକ ସାଧାରଣ ଅସ୍ତ୍ରୋପଚାର ପରେ ଜଣେ ସୁସ୍ଥ ସବଳ ଯୁବକ ମୃତ୍ୟୁ ସହ ପଞ୍ଝା ଲଢ଼େ, ତେବେ ସାଧାରଣ ଲୋକେ କାହା ଉପରେ ବିଶ୍ୱାସ କରିବେ? ସମ୍ବଲପୁର ବୁର୍ଲାର ପ୍ରତିଷ୍ଠିତ ଭିମସାର ମେଡିକାଲରୁ ଆସିଥିବା ଏକ ଅଭାବନୀୟ ଖବର ଏବେ ସାରା ରାଜ୍ୟରେ ଆଲୋଡ଼ନ ସୃଷ୍ଟି କରିଛି। ନାକରେ ସାଧାରଣ ମାଂସ ବୃଦ୍ଧିର ଚିକିତ୍ସା ପାଇଁ ଆସିଥିବା ୨୪ ବର୍ଷର ଯୁବକ ସଙ୍କେତ ସାହୁଙ୍କ ଯକୃତ, ବୃକକ୍ ଓ ଫୁସ୍ଫୁସ୍ ଏକାସାଙ୍ଗରେ ଅକାମୀ ହୋଇଯିବା ଘଟଣା, ସରକାରୀ ଚିକିତ୍ସା ପ୍ରଣାଳୀର ସୁରକ୍ଷା ଓ ଜବାବଦେହିତା ଉପରେ ଏକ ବିରାଟ ପ୍ରଶ୍ନବାଚୀ ଲଗାଇ ଦେଇଛି।
ଏମସିଏଲ୍ର ଏହି ଠିକା କର୍ମଚାରୀଙ୍କର ଅସ୍ତ୍ରୋପଚାର ପୂର୍ବରୁ ହୋଇଥିବା ୟୁରିଆ ଓ କ୍ରିଏଟିନିନ୍ ସମେତ ସମସ୍ତ ପରୀକ୍ଷା ରିପୋର୍ଟ ସମ୍ପୂର୍ଣ୍ଣ ନର୍ମାଲ ଥିଲା। ଡାକ୍ତରମାନେ ଅପରେସନ ସଫଳ ହେଲା ବୋଲି କହିବା ସହ ତାଙ୍କୁ ଘରକୁ ଛାଡ଼ିବା ପାଇଁ ପ୍ରସ୍ତୁତି ମଧ୍ୟ ଚାଲିଥିଲା। ହେଲେ ହଠାତ୍ ସ୍ଥିତି ଏମିତି ବିଗିଡ଼ିଗଲା ଯେ ସମସ୍ତେ ସ୍ତବ୍ଧ ହୋଇଗଲେ। କେହି କିଛି ବୁଝିବା ପୂର୍ବରୁ ସଙ୍କେତଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ହୋଇପଡ଼ିଥିଲା।
ସଙ୍କେତଙ୍କ ପରିବାର ଲୋକେ ଅଭିଯୋଗ କରିଛନ୍ତି ଯେ, ଅସ୍ତ୍ରୋପଚାର ପରେ ହଠାତ୍ ସଙ୍କେତଙ୍କୁ କ୍ରମାଗତ ଝାଡ଼ା ଓ ରକ୍ତବାନ୍ତି ହେବା ସହ ଶରୀରରେ ଅସ୍ୱାଭାବିକ ପରିବର୍ତ୍ତନ ଦେଖାଦେଇଥିଲା। ପରେ ଯେତେବେଳେ ପରୀକ୍ଷା କରାଗଲା, ଜଣାପଡ଼ିଲା ଯେ ତାଙ୍କର ଏକାଧିକ ଗୁରୁତ୍ୱପୂର୍ଣ୍ଣ ଅଙ୍ଗ ଗୁରୁତର ଭାବେ ପ୍ରଭାବିତ ହୋଇଛି ଏବଂ ରକ୍ତରେ ପ୍ଲେଟଲେଟ୍ ମଧ୍ୟ କମିଯାଇଛି। ଚିକିତ୍ସା ବିଜ୍ଞାନରେ ଏଭଳି ସ୍ଥିତି ଅତ୍ୟନ୍ତ ବିରଳ ହୋଇଥିବାରୁ, ଏହା ପଛରେ କୌଣସି ଭୟଙ୍କର ଔଷଧ ପ୍ରତିକ୍ରିୟା, ଅପରେସନ୍ ଥିଏଟର ସଂକ୍ରମଣ, ଅନେସ୍ଥେସିଆ ଜଟିଳତା କିମ୍ବା ପରବର୍ତ୍ତୀ ସମୟରେ ଅବହେଳା ଥାଇପାରେ ବୋଲି ସନ୍ଦେହ କରାଯାଉଛି।
ଘଟଣାର ସବୁଠାରୁ ଦୁଃଖଦାୟକ ଦିଗ ହେଉଛି ଯେ, ରୋଗୀର ଜୀବନ ସଙ୍କଟରେ ଥିବା ବେଳେ ତାଙ୍କୁ ସମୟୋଚିତ ଉଚ୍ଚସ୍ତରୀୟ ଚିକିତ୍ସା କିମ୍ବା ସଠିକ୍ ପରାମର୍ଶ ମିଳିପାରି ନଥିଲା। ବିଭିନ୍ନ ବିଭାଗର ଡାକ୍ତରମାନେ ରୋଗୀଙ୍କୁ ଦେଖିବାକୁ ଆସିଥିଲେ ମଧ୍ୟ ଏହି ସମସ୍ୟାର ପ୍ରକୃତ କାରଣ କେହି ସ୍ପଷ୍ଟ କରିପାରି ନଥିଲେ। ଏପରିକି ଜରୁରୀ ସମୟରେ ଏକ୍ସ-ରେ ଭଳି ଏକ ସାଧାରଣ ପରୀକ୍ଷା ପାଇଁ ମଧ୍ୟ ଦୀର୍ଘ ସମୟ ଅପେକ୍ଷା କରିବାକୁ ପଡ଼ିଥିବା ନେଇ ପରିବାର ପକ୍ଷରୁ ସାଙ୍ଘାତିକ ଅଭିଯୋଗ ହୋଇଛି, ଯାହା ମେଡିକାଲର ଆନ୍ତରିକତା ଉପରେ ପ୍ରଶ୍ନ ଉଠାଉଛି।
ପଶ୍ଚିମ ଓଡ଼ିଶାର ଲକ୍ଷ ଲକ୍ଷ ଗରିବ ଓ ମଧ୍ୟବିତ୍ତ ପରିବାର ପାଇଁ ଭିମସାର ହେଉଛି ଆଶା ଓ ଭରସାର ଏକମାତ୍ର ପ୍ରମୁଖ ସାହାରା। ଏଭଳି ଏକ ବଡ଼ ହସ୍ପିଟାଲ୍ରେ ଯଦି ସାଧାରଣ ରୋଗୀଙ୍କ ସୁରକ୍ଷା ଓ ଜରୁରୀକାଳୀନ ସେବା ବିପର୍ଯ୍ୟସ୍ତ ହୋଇପଡ଼େ, ତେବେ ଜନସାଧାରଣ ନିଜ ଜୀବନକୁ ନେଇ କାହା ଉପରେ ଭରସା କରିବେ? ଏହି ସଂସ୍ଥାର ଚିକିତ୍ସା ପ୍ରକ୍ରିୟାରେ ସ୍ୱଚ୍ଛତା ଓ ଜବାବଦେହିତା ରହିବା ଅତ୍ୟନ୍ତ ଜରୁରୀ।
ଅପରପକ୍ଷରେ, ଘଟଣାର ପ୍ରକୃତ କାରଣ ଖୋଜିବା ପାଇଁ ମେଡିକାଲ୍ କର୍ତ୍ତୃପକ୍ଷଙ୍କ ଦ୍ୱାରା ଗଠିତ ୫ ଜଣିଆ ବିଶେଷଜ୍ଞ କମିଟି ମଧ୍ୟ ଏପର୍ଯ୍ୟନ୍ତ କୌଣସି ସ୍ପଷ୍ଟ ନିଷ୍କର୍ଷରେ ପହଞ୍ଚି ପାରିନାହିଁ। ଯଦି ଏକ ବଡ଼ ମେଡିକାଲ କଲେଜର ବିଶେଷଜ୍ଞମାନେ କାରଣ ଜାଣିବାରେ ଅସମର୍ଥ, ତେବେ ରୋଗୀ ସୁରକ୍ଷା ବ୍ୟବସ୍ଥା କେତେ ସୁଦୃଢ଼ ଅଛି, ତାହା ସହଜେ ଅନୁମେୟ। ଏହି ବିଫଳତା ଆଶାୟୀ ପରିବାର ମନରେ ଆଶଙ୍କା ଓ ସନ୍ଦେହକୁ ଆହୁରି ବଢ଼ାଇ ଦେଇଛି।
ଏହି ସମଗ୍ର ଘଟଣାକୁ କେବଳ ଏକ ‘ଦୁର୍ଭାଗ୍ୟ’ କହି ଆଖି ବନ୍ଦ କରିଦେଲେ ଚଳିବ ନାହିଁ। ସରକାରୀ ଡାକ୍ତରଖାନାରେ ରୋଗୀ ସୁରକ୍ଷା ନୀତି ଏବଂ ଡାକ୍ତରୀ ଦାୟିତ୍ୱବୋଧର ପୁନଃ ସମୀକ୍ଷା ହେବା ଆଜିର ସମୟରେ ସବୁଠାରୁ ବଡ଼ ଆବଶ୍ୟକତା। ଯଦି ଚିକିତ୍ସା ପ୍ରୋଟୋକଲ୍ ଉଲ୍ଲଂଘନ କିମ୍ବା କୌଣସି ବି ସ୍ତରରେ ଅବହେଳା ହୋଇଛି, ତେବେ ତାହା ସାମ୍ନାକୁ ଆସିବା ଦରକାର ଏବଂ ଦାୟିତ୍ୱହୀନତା ଦେଖାଇଥିବା ଲୋକଙ୍କ ବିରୋଧରେ କଠୋର କାର୍ଯ୍ୟନୁଷ୍ଠାନ ଗ୍ରହଣ କରାଯିବା ଉଚିତ।
ବର୍ତ୍ତମାନ ପରିସ୍ଥିତିରେ ପରିବାରକୁ ଅନ୍ଧାରରେ ନରଖି ସଠିକ୍ ସୂଚନା ଦେବା ସହ ସଙ୍କେତଙ୍କ ଜୀବନ ରକ୍ଷା ପାଇଁ ଯାହା ବି ଆବଶ୍ୟକ, ତାହା ତୁରନ୍ତ କରାଯିବା ଦରକାର। ଯଦି ଆବଶ୍ୟକ ପଡ଼େ, ତାଙ୍କୁ ବିଳମ୍ବ ନକରି କୌଣସି ଉଚ୍ଚସ୍ତରୀୟ ହସ୍ପିଟାଲକୁ ସ୍ଥାନାନ୍ତର କରିବା ପାଇଁ ମେଡିକାଲ କର୍ତ୍ତୃପକ୍ଷ ନିଜ ଆଡ଼ୁ ପଦକ୍ଷେପ ନେବା ଉଚିତ। ସ୍ୱାସ୍ଥ୍ୟ ସେବା ଭଳି ଏକ ସେବା କ୍ଷେତ୍ରରେ ଯଦି ପାରଦର୍ଶିତା ନରହିବ, ତେବେ ସରକାରୀ ଚିକିତ୍ସା ବ୍ୟବସ୍ଥା ଉପରୁ ଗରିବ ଲୋକଙ୍କ ଭରସା ସମ୍ପୂର୍ଣ୍ଣ ଭାବେ ତୁଟିଯିବ।
ଭିମସାରର ଏହି ଘଟଣା କେବଳ ଜଣେ ଯୁବକଙ୍କ ଜୀବନର କାହାଣୀ ନୁହେଁ, ବରଂ ଏହା ଆମ ସମଗ୍ର ସ୍ୱାସ୍ଥ୍ୟ ବ୍ୟବସ୍ଥା ପାଇଁ ଏକ ବଡ଼ ସତର୍କ ଘଣ୍ଟି। ମେଡିକାଲରେ ହେଉଥିବା ଛୋଟ ଏକ ଭୁଲ୍ କେବଳ ଏକ କାଗଜପତ୍ରର ତ୍ରୁଟି ହୋଇ ରହିଯାଏ ନାହିଁ ବରଂ ଏହା ଜଣେ ନିରୀହ ମଣିଷର ଜୀବନ ଓ ତା’ ହସଖୁସିର ସଂସାରକୁ ସଦାଦିନ ପାଇଁ ଉଜାଡ଼ି ଦିଏ। ତେଣୁ ଏହି ମାମଲାରେ ପ୍ରକୃତ ସତ୍ୟତା ଖୁବ୍ ଶୀଘ୍ର ସାମ୍ନାକୁ ଆସିବା ଜରୁରୀ, ଯେମିତି ଆଉ କୌଣସି ପରିବାରକୁ ଏଭଳି ଦୁର୍ଦ୍ଦଶା ଭୋଗିବାକୁ ନପଡ଼େ।
