ନୂଆଦିଲ୍ଲୀ, ୧୭ ଅକ୍ଟୋବର: ଦେଶର ସ୍ମାର୍ଟଫୋନ୍ ପ୍ରିୟ ବ୍ୟବହାରକାରୀଙ୍କ ପାଇଁ ସାମସଙ୍ଗ ପକ୍ଷରୁ ଏକ ବଡ଼ ଖୁସିଖବର ସାମ୍ନାକୁ ଆସିଛି। ଭାରତୀୟ ବଜାରରେ ୨୦,୦୦୦ ଟଙ୍କାରୁ କମ୍ ମୂଲ୍ୟ ବର୍ଗରେ ପ୍ରିମିୟମ୍ କ୍ୟାମେରା ଏବଂ ଏଆଇ ଫିଚର ପ୍ରଦାନ କରିବା ପାଇଁ କମ୍ପାନୀ ଏହାର ନୂତନ ସ୍ମାର୍ଟଫୋନ୍ ‘ଗାଲାକ୍ସି ଏଫ୍୭୦ ୫ଜି’ ଆସନ୍ତା ଅକ୍ଟୋବର ୧୮ ତାରିଖରେ ଲଞ୍ଚ୍ କରିବାକୁ ଆନୁଷ୍ଠାନିକ ଭାବେ ଘୋଷଣା କରିଛି। ଅକ୍ଟୋବର ୧୬, ୨୦୨୬ରେ ଲାଇଭ୍ ହୋଇଥିବା ଫ୍ଲିପ୍କାର୍ଟ ମାଇକ୍ରୋସାଇଟ୍ ଅନୁଯାୟୀ, ଏହି ସ୍ମାର୍ଟଫୋନ୍ରେ ଅପ୍ଟିକାଲ୍ ଇମେଜ୍ ଷ୍ଟାବିଲାଇଜେସନ୍ ସପୋର୍ଟ ସହ ୫୦ ମେଗାପିକ୍ସେଲର ମୁଖ୍ୟ କ୍ୟାମେରା ଏବଂ ଗୁଗଲର ‘ସର୍କଲ୍ ଟୁ ସର୍ଚ୍ଚ’ ଭଳି ପ୍ରିମିୟମ୍ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଟୁଲ୍ସ ବ୍ୟବସ୍ଥା କରାଯାଇଛି। ଏହି ଫୋନ୍ଟି ‘ବୋଲ୍ଡ ବ୍ଲାକ୍’ ଏବଂ ‘ଭିଭିଡ୍ ଭାୟୋଲେଟ୍’ କଲର ଅପସନ୍ରେ ଫ୍ଲିପ୍କାର୍ଟ ଓ ସାମସଙ୍ଗ୍ ଷ୍ଟୋରରେ ଉପଲବ୍ଧ ହେବ।
ଗାଲାକ୍ସି ଏଫ୍୭୦ ୫ଜି ସ୍ମାର୍ଟଫୋନ୍ରେ ଫୁଲ୍-ଏଚ୍ଡି+ ରେଜୋଲ୍ୟୁସନ୍ ବିଶିଷ୍ଟ ସୁପର ଆମୋଲେଡ୍ ଫ୍ଲାଟ୍ ଡିସପ୍ଲେ ଏବଂ ସୁରକ୍ଷା ପାଇଁ କୋର୍ନିଂ ଗୋରିଲା ଗ୍ଲାସ୍ ଭିକ୍ଟସ୍ ପ୍ରୋଟେକ୍ସନ୍ ମିଳିବ। ଦମ୍ଦାର ପରଫରମାନ୍ସ ପାଇଁ ଏଥିରେ ସାମସଙ୍ଗର ନିଜସ୍ୱ ଏକ୍ସିନୋସ୍ ୧୩୩୦ ପ୍ରୋସେସର୍ ବ୍ୟବହୃତ ହୋଇଛି। କ୍ୟାମେରା ସେଟ୍ଅପ୍ରେ ୫୦ MP OIS ପ୍ରାଇମେରୀ କ୍ୟାମେରା ସହ ୫ MP ଅଲ୍ଟ୍ରାୱାଇଡ୍ ଏବଂ ୨ MP ମ୍ୟାକ୍ରୋ ସେନ୍ସର ରହିଥିବା ବେଳେ ସେଲ୍ଫି ପାଇଁ ୧୩ MP ଫ୍ରଣ୍ଟ କ୍ୟାମେରା ଦିଆଯାଇଛି। ଏହାସହିତ ୫,୦୦୦ mAh ବ୍ୟାଟେରୀ, ୨୫W ଫାଷ୍ଟ ଚାର୍ଜିଂ, ସାମସଙ୍ଗ ନକ୍ସ ସିକ୍ୟୁରିଟି ଏବଂ ୬ ବର୍ଷ ପର୍ଯ୍ୟନ୍ତ ଓଏସ୍ ଓ ସିକ୍ୟୁରିଟି ଅପ୍ଡେଟ୍ ସପୋର୍ଟ ମିଳିବା କାରଣରୁ ଏହା ବଜେଟ୍ ୫ଜି ମୋବାଇଲ୍ ବଜାରରେ ଏକ ବଡ଼ ପ୍ରତିଯୋଗୀ ସାବ୍ୟସ୍ତ ହେବାକୁ ଯାଉଛି।
