ମୁମ୍ବାଇ, ୧୪ ଅକ୍ଟୋବର ୨୦୨୬: ଦକ୍ଷିଣ ଭାରତୀୟ ସୁପରଷ୍ଟାର ରଜନୀକାନ୍ତଙ୍କ ଅଭିନୀତ ବହୁପ୍ରତୀକ୍ଷିତ ଆକ୍ସନ୍ ଥ୍ରୀଲର୍ ଚଳଚ୍ଚିତ୍ର ‘ଜେଲର୍ ୨’ ସିନେମାଘରକୁ ଆସିବାକୁ ଯାଉଛି। ୨୦୨୩ ମସିହାର ମେଗା ବ୍ଲକବଷ୍ଟର ଫିଲ୍ମ ‘ଜେଲର୍’ର ଏହି ସିକ୍ୱେଲ୍ ପାଇଁ ଦର୍ଶକଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି। ଫିଲ୍ମଟି ମୁକ୍ତିଲାଭ କରିବା ପୂର୍ବରୁ ଆଡ୍ଭାନ୍ସ ବୁକିଂରେ ଜବରଦସ୍ତ ଆୟ କରିଛି। ରିପୋର୍ଟ ଅନୁସାରେ, ଏହି ଫିଲ୍ମଟି ଭାରତୀୟ ବକ୍ସ ଅଫିସରେ ପ୍ରଥମ ଦିନ ପାଇଁ ପ୍ରାୟ ୩୨ କୋଟି ଟଙ୍କାର ପ୍ରି-ସେଲ୍ ହାସଲ କରିସାରିଛି ଏବଂ ପ୍ରଥମ ଚାରି ଦିନିଆ ସପ୍ତାହାନ୍ତ ପାଇଁ ୫୦ କୋଟି ଟଙ୍କା ଆଡ଼କୁ ଅଗ୍ରସର ହେଉଛି।
କେବଳ ଭାରତରେ ନୁହେଁ, ବିଦେଶୀ ବଜାରରେ ମଧ୍ୟ ଫିଲ୍ମଟି ଦୃଢ଼ ପ୍ରଦର୍ଶନ କରୁଛି। ବିଦେଶରୁ ୩ ମିଲିୟନ୍ ଆମେରିକୀୟ ଡରାର୍ରୁ ଅଧିକ ଆସିଥିବା ବେଳେ ବିଶ୍ୱବ୍ୟାପୀ ଆଡ୍ଭାନ୍ସ ବୁକିଂ ଆୟ ପ୍ରାୟ ୬୦ ରୁ ୭୦ କୋଟି ଟଙ୍କା ପାଖାପାଖି ପହଞ୍ଚିଛି। ବିଶେଷ କରି କେରଳ ଏବଂ କର୍ଣ୍ଣାଟକରେ ଫିଲ୍ମଟିକୁ ନେଇ ଦର୍ଶକଙ୍କ ମଧ୍ୟରେ ଅଧିକ କ୍ରେଜ୍ ରହିଛି। ଏହାଛଡ଼ା ମଧ୍ୟପ୍ରାଚ୍ୟ ତଥା ବିଦେଶୀ ରାଷ୍ଟ୍ରମାନଙ୍କରେ ମଧ୍ୟ ମାଲାୟାଲମ୍ ଏବଂ ତାମିଲ୍ ପ୍ରଶଂସକଙ୍କ ଦ୍ୱାରା ବହୁ ପରିମାଣରେ ଟିକେଟ୍ ବିକ୍ରି ହୋଇଛି। ଘରୋଇ ରାଜ୍ୟ ତାମିଲନାଡ଼ୁରେ ମଧ୍ୟ ଆଡ୍ଭାନ୍ସ ବୁକିଂ ବେଶ୍ ଭଲ ରହିଛି।
ଏସବୁ ଟ୍ରେଣ୍ଡ୍ ଏବଂ ବଜାର ସମୀକ୍ଷାକୁ ଦୃଷ୍ଟିରେ ରଖି ‘ଜେଲର୍ ୨’ ମୁକ୍ତିଲାଭର ପ୍ରଥମ ଦିନରେ ବିଶ୍ୱବ୍ୟାପୀ ୧୦୦ କୋଟି ଟଙ୍କାରୁ ଅଧିକ ଆୟ କରିବ ବୋଲି ଆଶା କରାଯାଉଛି। ୨୦୨୩ ମସିହାରେ ମୂଳ ଫିଲ୍ମଟି ବିଶ୍ୱବ୍ୟାପୀ ୬୦୦ କୋଟିରୁ ଅଧିକ ଆୟ କରିଥିବାବେଳେ, ଏହି ସିକ୍ୱେଲ୍ ସେହି ରେକର୍ଡକୁ ଭାଙ୍ଗିବ କିମ୍ବା ସମକକ୍ଷ ହେବ ବୋଲି ଟ୍ରେଡ୍ ବିଶ୍ଳେଷକମାନେ ମତ ଦେଇଛନ୍ତି। ଫିଲ୍ମର ଆଭ୍ୟନ୍ତରୀଣ ରିପୋର୍ଟ ମଧ୍ୟ ସକାରାତ୍ମକ ରହିଛି, ଯାହାକି ଆଗାମୀ ଦିନରେ ଫିଲ୍ମର ବ୍ୟାବସାୟିକ ସଫଳତା ପାଇଁ ଅତ୍ୟନ୍ତ ଅନୁକୂଳ ବୋଲି ପ୍ରମାଣିତ ହେବ।
