ଓଡ଼ିଶାର ଝାରସୁଗୁଡ଼ା ଜିଲ୍ଲାରେ ୧୦୨ଟି ହୋମଗାର୍ଡ ପଦବୀ ପାଇଁ ରବିବାର ୩,୨୦୦ରୁ ଅଧିକ ପ୍ରାର୍ଥୀ ପରୀକ୍ଷାରେ ଅଂଶଗ୍ରହଣ କରିଥିବା ସରକାରୀ ସୂତ୍ରରୁ ଜଣାପଡ଼ିଛି। ଏହି ପ୍ରାର୍ଥୀମାନଙ୍କ ମଧ୍ୟରେ ସ୍ନାତକ ଓ ସ୍ନାତକୋତ୍ତର ଯୋଗ୍ୟତା ଥିବା ଯୁବକମାନେ ମଧ୍ୟ ରହିଛନ୍ତି।
ସମ୍ପ୍ରତି ସମ୍ବଲପୁରର ଜମାଦରପାଲି ଏୟାରଷ୍ଟ୍ରିପରେ ହୋମଗାର୍ଡ ପଦବୀ ପାଇଁ ହଜାର ହଜାର ଯୁବକ ଲିଖିତ ପରୀକ୍ଷା ଦେଇଥିବା ଭିଡିଓ ସାମ୍ନାକୁ ଆସିଥିବା ପରେ ଏହି ଘଟଣା ରାଜ୍ୟରେ ଚର୍ଚ୍ଚାର ବିଷୟ ହୋଇଛି।
ଅଧିକାରୀମାନଙ୍କ କହିବାନୁସାରେ, ଝାରସୁଗୁଡ଼ାରେ ମୋଟ ୪,୦୪୦ ଜଣ ଆବେଦନ କରିଥିଲେ। ସେଥିରୁ ୩,୨୦୦ରୁ ଅଧିକ ପ୍ରାର୍ଥୀ ଲିଖିତ ପରୀକ୍ଷାରେ ଉପସ୍ଥିତ ହୋଇଥିଲେ। ଏହି ହୋମଗାର୍ଡ ପଦବୀ ଓଡ଼ିଶା ପୁଲିସ୍ ଅଧୀନରେ ଏକ ଅସ୍ଥାୟୀ ସେବା ଭାବେ ପରିଗଣିତ।
ହୋମଗାର୍ଡ ପଦବୀ ପାଇଁ ସର୍ବନିମ୍ନ ଶିକ୍ଷାଗତ ଯୋଗ୍ୟତା କେବଳ ପଞ୍ଚମ ଶ୍ରେଣୀ ପାସ୍ ହେବା ସତ୍ତ୍ୱେ ଦୈନିକ ୬୨୩ ଟଙ୍କା ପରିଶ୍ରମିକ ମିଳୁଥିବାରୁ ଏତେ ସଂଖ୍ୟାରେ ପ୍ରାର୍ଥୀ ଆଗ୍ରହ ପ୍ରଦର୍ଶନ କରିଛନ୍ତି।
ଅଧିକାରୀମାନେ କହିଛନ୍ତି ଯେ ଲିଖିତ ପରୀକ୍ଷାରେ ଅଂଶଗ୍ରହଣ କରିଥିବା ପ୍ରାୟ ୧,୦୧୦ ଜଣ ପ୍ରାର୍ଥୀଙ୍କୁ ଶାରୀରିକ ପରୀକ୍ଷା ପାଇଁ ଚୟନ କରାଯିବ। ଲିଖିତ ଓ ଶାରୀରିକ—ଏହି ଦୁଇ ପର୍ଯ୍ୟାୟର କାର୍ଯ୍ୟଦକ୍ଷତା ଆଧାରରେ ଅନ୍ତିମ ଚୟନ କରାଯିବ।
ଏହା ପୂର୍ବରୁ ସମ୍ବଲପୁରରେ ୧୮୭ଟି ହୋମଗାର୍ଡ ପଦବୀ ପାଇଁ ପ୍ରାୟ ୮,୦୦୦ ଜଣ ପ୍ରାର୍ଥୀ ଉପସ୍ଥିତ ହୋଇଥିବାବେଳେ, ରାଉରକେଲାରେ ୨୦୨ଟି ପଦବୀ ପାଇଁ ପ୍ରାୟ ୯,୦୦୦ ଜଣ ଯୁବକ ଲିଖିତ ପରୀକ୍ଷା ଦେଇଥିଲେ।
ରାଜ୍ୟରେ ଚାକିରି ସୁଯୋଗ ଅଭାବ ଓ ଚାକିରି ପାଇଁ ଭୟଙ୍କର ପ୍ରତିସ୍ପର୍ଧାକୁ ଏହି ଘଟଣାଗୁଡ଼ିକ ସ୍ପଷ୍ଟ କରୁଛି।
