ଭୁବନେଶ୍ୱର:
ଦେଶରେ ବାୟୁ ପ୍ରଦୂଷଣ ତାଲିକାରେ ଓଡ଼ିଶା ପୁଣିଥରେ ଶୀର୍ଷରେ ରହିଛି। ଗୁରୁବାର ରାଜ୍ୟର ତିନିଟି ସହରର ବାୟୁ ଗୁଣବତ୍ତା ସୂଚକାଙ୍କ (AQI) ୩୦୦ରୁ ଉର୍ଦ୍ଧ୍ୱରେ ରେକର୍ଡ ହୋଇ, ଦିଲ୍ଲୀକୁ ଅତିକ୍ରମ କରିଛି ।
ବାଲେଶ୍ୱର ଦେଶର ସର୍ବାଧିକ ପ୍ରଦୂଷିତ ଅଞ୍ଚଳ ଭାବେ ଉଭାସିତ ହୋଇଛି। ଏଠାରେ AQI ୩୩୮ ରେକର୍ଡ ହୋଇ ‘ବହୁତ ଖରାପ’ ଶ୍ରେଣୀରେ ପହଞ୍ଚିଛି। ଶିଳ୍ପ ନଗରୀ ତାଳଚେରର AQI ୩୨୦ ରହିଥିବାବେଳେ, ମୟୂରଭଞ୍ଜର ବାରିପଦା ସହରରେ ମଧ୍ୟ AQI ୩୦୦ ଉପରେ ଥିବା ସୂଚନା ମିଳିଛି। ଏହି ସହରଗୁଡ଼ିକ ଦେଶର ଅନ୍ୟାନ୍ୟ ପ୍ରଦୂଷିତ ଅଞ୍ଚଳ—ହଳଦିଆ, ରୂପନଗର ଓ ବିଶାଖାପଟ୍ଟଣମ ସହ ସମକକ୍ଷ ହୋଇଛନ୍ତି।
ରାଜଧାନୀ ଭୁବନେଶ୍ୱର ଓ କଟକରେ ମଧ୍ୟ ବାୟୁର ଗୁଣବତ୍ତା ‘ଖରାପ’ ଶ୍ରେଣୀରେ ରହିଛି। ଭୁବନେଶ୍ୱରର AQI ୨୩୯ ଓ କଟକର ୨୬୦ ରେକର୍ଡ ହୋଇଥିବାବେଳେ, ସନ୍ଧ୍ୟା ସମୟରେ ଦିଲ୍ଲୀର AQI ପ୍ରାୟ ୨୩୪ ଥିଲା ବୋଲି କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (CPCB) ସୂଚନା ଦେଇଛନ୍ତି।
ଗତ ସପ୍ତାହରେ ଅନୁଗୁଳ ତଥା ତାଳଚେର ମଧ୍ୟ ଦେଶର ସର୍ବାଧିକ ପ୍ରଦୂଷିତ ପାଞ୍ଚଟି ସହର ମଧ୍ୟରେ ରହିଥିଲା। ତାଳଚେରର AQI ୩୩୬ ଓ ଅନୁଗୁଳର ୩୦୩ ରେକର୍ଡ ହୋଇଥିଲା।
ଚିନ୍ତାର ବିଷୟ ହେଉଛି, ବାଲେଶ୍ୱରର ବାୟୁ ଗୁଣବତ୍ତା ପୂର୍ବ ସପ୍ତାହରେ ଅନ୍ତତଃ ତିନିଦିନ ଏବଂ ଡିସେମ୍ବର ମାସରେ ମୋଟ ଛଅ ଦିନ ୩୦୦ ଉପରେ ରହିଛି। ଅନୁଗୁଳରେ ମଧ୍ୟ ଗତ ସପ୍ତାହରେ ଚାରିଥର AQI ୩୦୦ ପାର କରିଛି।
ପରିବେଶ ବିଶେଷଜ୍ଞମାନଙ୍କ କହିବାନୁସାରେ, ଶୀତକାଳୀନ ପାଣିପାଗ, କମ୍ ପବନ ପ୍ରବାହ ସହିତ ଯାନବାହନ ଧୂଆଁ, ନିର୍ମାଣ କାମର ଧୂଳି ଓ ଅବଶିଷ୍ଟ ଜାଳେଣୀ ପ୍ରଦୂଷଣ ବଢ଼ିବାର ପ୍ରମୁଖ କାରଣ।
“ଯାନବାହାନ ଚଳାଚଳ ଏବଂ ନିର୍ମାଣ କାର୍ଯ୍ୟକଳାପରୁ ବୃଦ୍ଧି ପାଉଥିବା ଧୂଳି ପ୍ରଦୂଷଣର ସ୍ତର ବିରୁଦ୍ଧରେ ପର୍ଯ୍ୟାପ୍ତ ହସ୍ତକ୍ଷେପ ସୁନିଶ୍ଚିତ କରିବା ପାଇଁ ପୌର ପରିଷଦ ସ୍ତରରେ ସ୍ଥାନୀୟ କାର୍ଯ୍ୟ ବାହିନୀ ଗଠନ କରାଯିବା ଉଚିତ, ଯେତେବେଳେ ଅନିୟମିତ ଆବର୍ଜନା ପୋଡ଼ାକୁ ହ୍ରାସ କରିବାରେ ସମ୍ପ୍ରଦାୟର ସକ୍ରିୟ ଅଂଶଗ୍ରହଣ ବୃଦ୍ଧି କରାଯିବା ଉଚିତ। ଏହି ସମସ୍ୟାଗୁଡ଼ିକର ପ୍ରଭାବଶାଳୀ ମୁକାବିଲା ପାଇଁ ପୌର ପରିଷଦ ସ୍ତରରେ ଲୋକଙ୍କ ପ୍ରଦୂଷଣ ସମ୍ବନ୍ଧୀୟ ଅଭିଯୋଗ ପଞ୍ଜିକରଣ କରିବା ପାଇଁ ଏକ ସୁବିଧାଜନକ ଆପ୍ ବିକଶିତ କରାଯିବା ଆବଶ୍ୟକ,” ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ, ଓଡ଼ିଶାର ଜଣେ ପରିବେଶ ବିଜ୍ଞାନୀ କହିଛନ୍ତି।
